Scripture Library

Paippalāda-Saṃhitā · Chapter 4.1

4.1.1

hiraṇyagarbhaḥ sam avartatāgre
bhūtasya jātaḥ patir eka āsīt |
sa dādhāra pṛthivīṃ dyām utāmuṃ
tasmai devāya haviṣā vidhema ||

4.1.2

ya ojodā baladā yaś ca viśva
upāsate praśiṣaṃ yasya devāḥ |
yasya chāyāmṛtaṃ yasya mṛtyus
tasmai devāya haviṣā vidhema ||

4.1.3

yaḥ prāṇato nimiṣato vidhartā
patir viśvasya jagato babhūva |
ya īśe 'sya dvipado yaś catuṣpadas
tasmai devāya haviṣā vidhema ||

4.1.4

yena dyaur ugrā pṛthivī ca dṛḍhā
yena sva stabhitaṃ yena nākaḥ |
yo antarikṣaṃ vimame varīyas
tasmai devāya haviṣā vidhema ||

4.1.5

ya ime dyāvāpṛthivī tastabhāna-
-adhārayad avasā rejamāne |
yasminn adhi vitata eti sūryas
tasmai devāya haviṣā vidhema ||

4.1.6

yasya viśve himavanto mahitvā
samudraṃ yasya rasayā sahāhuḥ |
diśo yasya pradiśaḥ pañca devīs
tasmai devāya haviṣā vidhema ||

4.1.7

āpo ha yasya viśvam āyur
dadhānā garbhaṃ janayanta mātaraḥ |
tatra devānām adhi deva āsta
ekasthūṇe vimite dṛḍha ugre ||

4.1.8

āpo garbhaṃ janayantīr
vatsam agre sam airayan |
tasyota jāyamānasya-
-ulba āsīd dhiraṇyayaḥ ||

4.1.9

hiraṇya ulba āsīd yo
'gre vatso ajāyata |
taṃ yonyor vidravantyoḥ
pary apaśyad ditir mahī ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0