પૈપ્પલાદ-સંહિતા · અધ્યાય 4.2

ભૂતો ભૂતેષુ પય આ દધાતિ
સ ભૂતાનામ્ અધિપતિર્ બભૂવ ।
સ તે મૃત્યુશ્ ચરતિ રાજસૂયં
સ રાજા રાજ્યમ્ અનુ મન્યતામ્ ઇદમ્ ॥

અભિ પ્રેહિ વીરયસ્વ-
-ઉગ્રશ્ ચેત્તા સપત્નહા ।
આ તિષ્ઠ મિત્રવર્ધન
તુભ્યં દેવા અધિ બ્રુવન્ ॥

આતિષ્ઠન્તં પરિ વિશ્વે અભૂષઞ્
છ્રિયં વસાનશ્ ચરતિ સ્વરોચિઃ ।
મહત્ તદ્ વૃષ્ણો અસુરસ્ય નામ-
-આ વિશ્વરૂપો અમૃતાનિ તસ્થૌ ॥

એના વ્યાઘ્રં પરિષસ્વજાનાઃ
સિંહં હિન્વન્તિ મહતે સૌભગાય ।
મહિષં ન સુભુવસ્ તસ્થિવાંસં
મર્મૃજ્યન્તે દ્વીપિનમ્ અપ્સ્વ્ અન્તઃ ॥

વ્યાઘ્રો અધિ વૈયાઘ્રે
વિ ક્રમસ્વ દિશો મહીઃ ।
વિશસ્ ત્વા સર્વા આ યન્ત્વ્
આપો દિવ્યાઃ પયસ્વતીઃ ॥

યા આપો દિવ્યાઃ પયસા મદન્તિ
યા અન્તરિક્ષ ઉત પાર્થિવા યાઃ ।
તાસાં ત્વા સર્વાસામ્ અપામ્
અભિ ષિઞ્ચામિ વર્ચસા ॥

અભિ ત્વા વર્ચસાસિચં
દિવ્યેન પયસા સહ ।
યથાસો મિત્રવર્ધનસ્
તથા ત્વા સવિતા કરત્ ॥