Scripture Library

Paippalāda-Saṃhitā · Chapter 4.10

4.10.1

bhagas tveto nayatu hastagṛhya
bṛhaspatiḥ puraetā te astu |
devas tvā savitā satyadharmā-
-upasadyāṃ namasyāṃ kṛṇotu ||

4.10.2

yām aśvinā madhukaśāṃ
devā agre ajanayan |
tayā tvā patyām otāṃ
kṛṇmo madhumatīṃ vayam ||

4.10.3

uttarā śvaśruvā bhava
nanāndur upaśikṣayā |
yaśas tvā patyāṃ kṛṇmo
bhavā devṛṣu priyā ||

4.10.4

adbhir ātmānaṃ tanvaṃ śumbhamānā
gṛhān prehi mahiṣī bhavāsi |
tatra tvādur gārhapatyāya devāḥ
prajāvatī jaradaṣṭir yathāsaḥ ||

4.10.5

ud uttaram ārohantī
vyasyantī pṛtanyataḥ |
abhy aṣṭhāḥ śatror mūrdhānaṃ
sahaputrā virāḍ bhava ||

4.10.6

śvaśrūṇāṃ śvaśurāṇāṃ
gṛhāṇāṃ ca bhagasya ca |
vi rāja patyāṃ devṛṣu
sajātānāṃ virāḍ bhava ||

4.10.7

yad giriṣu parvateṣu
goṣv aśveṣu yan madhu |
yenākṣā abhyaṣicyanta
tenāham asyā mūrdhānam
abhi ṣiñcāmi nāryāḥ ||

4.10.8

yad varco gavi kalyāṇe
yad vā sūyavase tṛṇe |
abhyañjanasya yad varcas
tena mānajmi varcasā ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0