Scripture Library

Paippalāda-Saṃhitā · Chapter 3.6

3.6.1

agnir no vidvān praty etu śatrūn
pratidahann abhiśastim arātim |
sa senāṃ mohayatu pareṣāṃ
nihastāṃś ca kṛṇavaj jātavedāḥ ||

3.6.2

yūyam ugrā maruta īdṛśe stha-
-abhi preta mṛḍata sahadhvam |
amīmṛḍan vasavo nāthitebhyo
+'gnir hy eṣāṃ vidvān praty etu śatrūn ||

3.6.3

amitrasenāṃ maghavann
asmāñ chatrūyatām abhi |
yuvaṃ tān indra vṛtrahann
agniś ca dahataṃ prati ||

3.6.4

prasūta indraḥ pravatā haribhyāṃ
pra te vajraḥ pra mṛṇann etu śatrūn |
jahi pratīco anūcaḥ parāco
viśvaṃ hi riṣṭaṃ kṛṇuhi satyam eṣām ||

3.6.5

senāmohanaṃ kṛṇv
indrāmitrebhyas tvam |
agner vātasya dhrājyā
tān viṣūco vi nāśaya ||

3.6.6

indraḥ senāṃ mohayatu
maruto ghnantv ojasā |
cakṣūṃṣy agnir ā dattāṃ
punar etu parājitām ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0