Paippalāda-Saṃhitā · Chapter 3.37
smara smaro 'si
devair datto 'si smara |
amuṣya mana ā smara
yathāhaṃ kāmaye tathā ||
śocayāsya hṛdayaṃ kāma gaccha-
-aṅgajvaro dahatu śocatu tmanā |
saṅkalpā asya samarantādhībhir
iyam evāsya digamahanyanyāḥ ||
nirānandāḥ pramucchado manomuho
nayuvo naṣṭakṛtvā araṇyavaḥ |
āveśinīḥ pradrupo ropayiṣṇur
eta āstādhyaḥ pra hiṇomi brahmaṇā ||
hṛtkartanī ṛtudā grāmānnāśanīḥ
svapnacchida ughnanīghnā manomuhaḥ |
āveśinīḥ pradrupo ropayiṣṇur
eta āstādhyaḥ pra hiṇomi brahmaṇā ||
indrāgnī mitrāvaruṇā te adya-
-ubhe ca dyāvāpṛthivī mātariśvā |
aśvinā devaḥ savitā bhagaś ca
manas ta u ghnantu na ramāsā atra ||
trayastriṃśat tvā uta ghnantu devā
ādhyaś cittam upa te bharantām |
bharadvājasya matayas ta īśatāṃ
chinneva naur bandhanāt pra plavasva ||
etāḥ patanty ādhyo
vārṣikīr iva vidyutaḥ |
tāsāṃ pratigraho bhava
sāyaṃ goṣṭhe gavām iva ||
ni śīrṣato ni pātita
ādhyo veśayāmi te |
tās tvā samuttudantīr
bodhayantīr upāsatām ||
etās ta ādhyaḥ pra hiṇomi brahmaṇā
tṛprā aśrīpurogavāḥ |
tās tvā tṛṇam iva śoṣayān
atho tvā rodayān bahu ||
Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0