Scripture Library

Paippalāda-Saṃhitā · Chapter 3.36

3.36.1

jaya prehi māpa krāmaḥ
śatrūṇāṃ veda ā khida |
indraḥ sapatnahā bhīmaḥ
sañjayas te sam ānṛdhat ||

3.36.2

tvaṃ jayāsi na parā jayāsā
arbheṣv ājau maghavan mahatsu ca |
ugraṃ cit tvām avase saṃ śiśīmahe
sa tvaṃ na indra havaneṣu mṛḍa ||

3.36.3

gojitā bāhū asamakratū yudhi
karmankarmañ chatamūtī svajaṅkarā |
akalpa indro 'pratimānam ojaḥ
sa tvaṃ na indra havaneṣu mṛḍa ||

3.36.4

vedāham aindraṃ priyam asya śevadhiṃ
yad asya nāma guhyaṃ samīke |
sa ij jayāti maghavā mamāsaty
asmākaṃ yudhmo vihave havaṃ gamat ||

3.36.5

vayaṃ jayema tvāyujā bhṛto
asmākam aṃśam ud avā bharebhare |
asmabhyam indra varivaḥ sugaṃ kṛdhi
pra śatrūṇāṃ maghavan vṛṣṇiyā ruja ||

3.36.6

tvāṃ deveṣu prathamaṃ havāmahe
tvaṃ babhūvitha pṛtanāsu sāsahiḥ |
semaṃ naḥ kārum upamanyum udbhidam
indra karāsi prasave rathaṃ puraḥ ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0