Paippalāda-Saṃhitā · Chapter 3.34

ayaṃ te yonir ṛtviyo
yato jāto arocathāḥ |
taṃ jānann agna ā roha-
-athā no vardhayā rayim ||

pradātāraṃ havāmahe
agnim ugram ūtaye |
śucir yo vṛtrahantamaḥ ||

agne acchā vadeha naḥ
pratyaṅ naḥ sumanā bhava |
pra ṇo yaccha viśāṃ pate
dhanadā asi nas tvam ||

pra ṇo yacchatv aryamā
pra bhagaḥ pra bṛhaspatiḥ |
pra pūṣā prota sūnṛtā
rayiṃ devī dadhātu naḥ ||

aryamaṇaṃ bṛhaspatim
indraṃ dānāya codaya |
vātaṃ viṣṇuṃ sarasvatīṃ
savitāraṃ ca vājinam ||

somaṃ rājānam avase
'gniṃ gīrbhir havāmahe |
ādityaṃ viṣṇuṃ sūryaṃ
brahmāṇaṃ ca bṛhaspatim ||

indravāyū bṛhaspatiḥ
suhaveha havāmahe |
yathā naḥ sarvam ij jagat
saṅgatyāṃ sumanā asat ||

tvaṃ no agne agnibhir
brahma yajñaṃ ca vardhaya |
tvaṃ no deva dātave
rayiṃ dānāya codaya ||

vājasyedaṃ prasave saṃbabhūva
memā ca viśvā bhuvanāny antaḥ |
utāditsantaṃ dāpayati prajānan
rayiṃ ca naḥ sarvavīraṃ ni yacchāt ||

duhrāṃ me pañca pradiśo
duhrām urvīr yathābalam |
prāpeyaṃ sarvām ākūtiṃ
manasā hṛdayena ca ||

gosaniṃ vācam udeyaṃ
varcasā mābhy ūrṇuhi |
ā rundhāṃ sarvato vāyus
tvaṣṭā poṣāya dhriyatām ||