Scripture Library

Paippalāda-Saṃhitā · Chapter 3.33

3.33.1

samās tvāgna ṛtavo vardhayantu
saṃvatsara ṛṣayo yāni satyā |
saṃ dyumnena dīdihi rocanena
viśvā ā bhāhi pradiśaś catasraḥ ||

3.33.2

saṃ cedhyasvāgne pra ca bodhayainam
uc ca tiṣṭha mahate saubhagāya |
mā te riṣann upasattāro atra
brāhmaṇās te yaśasaḥ santu mānye ||

3.33.3

tvām agne vṛṇate brāhmaṇā ime
śivo agne prataraṇo na edhi |
sapatnahāgne abhimātijid bhava
sve kṣaye dīdihy aprayucchan ||

3.33.4

ihaivāgne adhi dhārayā rayiṃ
mā tvā dabhan pūrvacittā nikāriṇaḥ |
kṣatram agne suyamam astu tubhyam
upasattā vardhatāṃ te aniṣṭṛtaḥ ||

3.33.5

kṣatreṇāgne svena saṃ rabhasva
mitreṇāgne mitradheyaṃ yatasva |
sajātānāṃ madhyameṣṭheyam asyā
rājñām agne vihavyo dīdihīha ||

3.33.6

ati niho 'ti nirṛtīr
aty arātīr ati dviṣaḥ |
viśvā hy agne duritā tara tvam
athāsmabhyaṃ sahavīraṃ rayiṃ dāḥ ||

3.33.7

anādhṛṣyo jātavedā aniṣṭṛto
virāḍ agne kṣatrabhir dīdihīha |
vyamīvāḥ pramuñcan mānuṣebhyaḥ
śivebhir adya pari pāhi no gayaiḥ ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0