પૈપ્પલાદ-સંહિતા · અધ્યાય 3.34

અયં તે યોનિર્ ઋત્વિયો
યતો જાતો અરોચથાઃ ।
તં જાનન્ન્ અગ્ન આ રોહ-
-અથા નો વર્ધયા રયિમ્ ॥

પ્રદાતારં હવામહે
અગ્નિમ્ ઉગ્રમ્ ઊતયે ।
શુચિર્ યો વૃત્રહન્તમઃ ॥

અગ્ને અચ્છા વદેહ નઃ
પ્રત્યઙ્ નઃ સુમના ભવ ।
પ્ર ણો યચ્છ વિશાં પતે
ધનદા અસિ નસ્ ત્વમ્ ॥

પ્ર ણો યચ્છત્વ્ અર્યમા
પ્ર ભગઃ પ્ર બૃહસ્પતિઃ ।
પ્ર પૂષા પ્રોત સૂનૃતા
રયિં દેવી દધાતુ નઃ ॥

અર્યમણં બૃહસ્પતિમ્
ઇન્દ્રં દાનાય ચોદય ।
વાતં વિષ્ણું સરસ્વતીં
સવિતારં ચ વાજિનમ્ ॥

સોમં રાજાનમ્ અવસે
ઽગ્નિં ગીર્ભિર્ હવામહે ।
આદિત્યં વિષ્ણું સૂર્યં
બ્રહ્માણં ચ બૃહસ્પતિમ્ ॥

ઇન્દ્રવાયૂ બૃહસ્પતિઃ
સુહવેહ હવામહે ।
યથા નઃ સર્વમ્ ઇજ્ જગત્
સઙ્ગત્યાં સુમના અસત્ ॥

ત્વં નો અગ્ને અગ્નિભિર્
બ્રહ્મ યજ્ઞં ચ વર્ધય ।
ત્વં નો દેવ દાતવે
રયિં દાનાય ચોદય ॥

વાજસ્યેદં પ્રસવે સંબભૂવ
મેમા ચ વિશ્વા ભુવનાન્ય્ અન્તઃ ।
ઉતાદિત્સન્તં દાપયતિ પ્રજાનન્
રયિં ચ નઃ સર્વવીરં નિ યચ્છાત્ ॥

દુહ્રાં મે પઞ્ચ પ્રદિશો
દુહ્રામ્ ઉર્વીર્ યથાબલમ્ ।
પ્રાપેયં સર્વામ્ આકૂતિં
મનસા હૃદયેન ચ ॥

ગોસનિં વાચમ્ ઉદેયં
વર્ચસા માભ્ય્ ઊર્ણુહિ ।
આ રુન્ધાં સર્વતો વાયુસ્
ત્વષ્ટા પોષાય ધ્રિયતામ્ ॥