Scripture Library

Paippalāda-Saṃhitā · Chapter 3.2

3.2.1

hariṇasya raghuṣyado
'dhi śīrṣaṇi bheṣajam |
sukṣetriyaṃ viṣāṇayād
visūcīnam anīnaśat ||

3.2.2

anu tvā hariṇo vṛṣā
padbhiś caturbhir akramīt |
viṣāṇe vi ṣya guṣpitaṃ
yat kiṃ ca kṣetriyaṃ hṛdi ||

3.2.3

ado yad avarocate
catuṣpakṣam iva cchadiḥ |
tena te sarvaṃ kṣetriyam
aṅgebhyo nāśayāmasi ||

3.2.4

ud agātāṃ bhagavatī
vicṛtau nāma tārake |
vi kṣetriyasya muñcatām
adhamaṃ pāśam uttamam ||

3.2.5

yad āsuteḥ kriyamāṇāyāḥ
kṣetriyaṃ tvā vyānaśe |
vedāhaṃ tasya bheṣajaṃ
kṣetriyaṃ nāśayāmi te ||

3.2.6

apavāse nakṣatrāṇām
apavāsa utoṣasām |
apāsmat sarvam āmayad
apa kṣetriyam akramīt ||

3.2.7

āpa id vā u bheṣajīr
āpo amīvacātanīḥ |
āpo viśvasya bheṣajīs
tās tvā muñcantu kṣetriyāt ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0