પૈપ્પલાદ-સંહિતા · અધ્યાય 3.2

હરિણસ્ય રઘુષ્યદો
ઽધિ શીર્ષણિ ભેષજમ્ ।
સુક્ષેત્રિયં વિષાણયાદ્
વિસૂચીનમ્ અનીનશત્ ॥

અનુ ત્વા હરિણો વૃષા
પદ્ભિશ્ ચતુર્ભિર્ અક્રમીત્ ।
વિષાણે વિ ષ્ય ગુષ્પિતં
યત્ કિં ચ ક્ષેત્રિયં હૃદિ ॥

અદો યદ્ અવરોચતે
ચતુષ્પક્ષમ્ ઇવ ચ્છદિઃ ।
તેન તે સર્વં ક્ષેત્રિયમ્
અઙ્ગેભ્યો નાશયામસિ ॥

ઉદ્ અગાતાં ભગવતી
વિચૃતૌ નામ તારકે ।
વિ ક્ષેત્રિયસ્ય મુઞ્ચતામ્
અધમં પાશમ્ ઉત્તમમ્ ॥

યદ્ આસુતેઃ ક્રિયમાણાયાઃ
ક્ષેત્રિયં ત્વા વ્યાનશે ।
વેદાહં તસ્ય ભેષજં
ક્ષેત્રિયં નાશયામિ તે ॥

અપવાસે નક્ષત્રાણામ્
અપવાસ ઉતોષસામ્ ।
અપાસ્મત્ સર્વમ્ આમયદ્
અપ ક્ષેત્રિયમ્ અક્રમીત્ ॥

આપ ઇદ્ વા ઉ ભેષજીર્
આપો અમીવચાતનીઃ ।
આપો વિશ્વસ્ય ભેષજીસ્
તાસ્ ત્વા મુઞ્ચન્તુ ક્ષેત્રિયાત્ ॥