Paippalāda-Saṃhitā · Chapter 20.7

yan no agnir asanad yan na indro
viśve yad devā marutaḥ svarkāḥ |
tad asmabhyaṃ savitā satyadharmā
sarasvaty anumatir ni yacchāt ||

yūyaṃ no devā ubhayāya vedase
śarma yacchata dvipade catuṣpade |
adat pibad ūrjayamānam āśitaṃ
tad asmabhyaṃ śaṃ yor arapo dadhāta ||

bṛhaspate savitar bodhayainaṃ
saṃśitaṃ cit saṃtaraṃ saṃ śiśādhi |
vardhayainaṃ mahate saubhagāya
viśva enam anu madanti devāḥ ||

amutrabhūyād adhi yad yamasya
bṛhaspatir abhiśastyā amuñcata |
prati mṛtyum auhatām aśvinā te
devānām agne bhiṣajā śacībhiḥ ||

indrāvaruṇā sutapāv imaṃ sutaṃ
madyaṃ somaṃ pibataṃ dhṛtavratā |
yuvo ratho adhvaraṃ devavītaye
prati svasaram upa yāti pītaye ||

indrāvaruṇā madhumattamasya
vṛṣṇaḥ somasya vṛṣaṇā vṛṣethām |
idaṃ vām asme pariṣiktam andha
āsadyāsmin barhiṣi mādayethām ||

uru viṣṇo vi kramasv-
-oru kṣayāya niṣ kṛdhi |
ghṛtaṃ ghṛtayone piba
pra pra yajñapatiṃ tira ||

divo viṣṇa uta vā pṛthivyā
uror vā viṣṇo maho antarikṣāt |
ubhā hi hastau madhunā pṛṇasv-
-āprayaccha dakṣiṇād ota savyāt ||

viṣṇor nū kaṃ pra vocaṃ vīryāṇi
yaḥ pārthivāni vimame rajāṃsi |
yo askabhāyad uttaraṃ sadhasthaṃ
vicakramāṇas tredhorugāyaḥ ||

pra tad viṣṇu stavate vīryāṇi
mṛgo na bhīmaḥ kucaro giriṣṭhāḥ |
yasyoruṣu triṣu vikramaṇeṣv
adhikṣiyanti bhuvanāni viśvā ||