પૈપ્પલાદ-સંહિતા · અધ્યાય 20.7

યન્ નો અગ્નિર્ અસનદ્ યન્ ન ઇન્દ્રો
વિશ્વે યદ્ દેવા મરુતઃ સ્વર્કાઃ ।
તદ્ અસ્મભ્યં સવિતા સત્યધર્મા
સરસ્વત્ય્ અનુમતિર્ નિ યચ્છાત્ ॥

યૂયં નો દેવા ઉભયાય વેદસે
શર્મ યચ્છત દ્વિપદે ચતુષ્પદે ।
અદત્ પિબદ્ ઊર્જયમાનમ્ આશિતં
તદ્ અસ્મભ્યં શં યોર્ અરપો દધાત ॥

બૃહસ્પતે સવિતર્ બોધયૈનં
સંશિતં ચિત્ સંતરં સં શિશાધિ ।
વર્ધયૈનં મહતે સૌભગાય
વિશ્વ એનમ્ અનુ મદન્તિ દેવાઃ ॥

અમુત્રભૂયાદ્ અધિ યદ્ યમસ્ય
બૃહસ્પતિર્ અભિશસ્ત્યા અમુઞ્ચત ।
પ્રતિ મૃત્યુમ્ ઔહતામ્ અશ્વિના તે
દેવાનામ્ અગ્ને ભિષજા શચીભિઃ ॥

ઇન્દ્રાવરુણા સુતપાવ્ ઇમં સુતં
મદ્યં સોમં પિબતં ધૃતવ્રતા ।
યુવો રથો અધ્વરં દેવવીતયે
પ્રતિ સ્વસરમ્ ઉપ યાતિ પીતયે ॥

ઇન્દ્રાવરુણા મધુમત્તમસ્ય
વૃષ્ણઃ સોમસ્ય વૃષણા વૃષેથામ્ ।
ઇદં વામ્ અસ્મે પરિષિક્તમ્ અન્ધ
આસદ્યાસ્મિન્ બર્હિષિ માદયેથામ્ ॥

ઉરુ વિષ્ણો વિ ક્રમસ્વ્-
-ઓરુ ક્ષયાય નિષ્ કૃધિ ।
ઘૃતં ઘૃતયોને પિબ
પ્ર પ્ર યજ્ઞપતિં તિર ॥

દિવો વિષ્ણ ઉત વા પૃથિવ્યા
ઉરોર્ વા વિષ્ણો મહો અન્તરિક્ષાત્ ।
ઉભા હિ હસ્તૌ મધુના પૃણસ્વ્-
-આપ્રયચ્છ દક્ષિણાદ્ ઓત સવ્યાત્ ॥

વિષ્ણોર્ નૂ કં પ્ર વોચં વીર્યાણિ
યઃ પાર્થિવાનિ વિમમે રજાંસિ ।
યો અસ્કભાયદ્ ઉત્તરં સધસ્થં
વિચક્રમાણસ્ ત્રેધોરુગાયઃ ॥

પ્ર તદ્ વિષ્ણુ સ્તવતે વીર્યાણિ
મૃગો ન ભીમઃ કુચરો ગિરિષ્ઠાઃ ।
યસ્યોરુષુ ત્રિષુ વિક્રમણેષ્વ્
અધિક્ષિયન્તિ ભુવનાનિ વિશ્વા ॥