Paippalāda-Saṃhitā · Chapter 20.49

sṛjāmy āpa uśatīr upemāḥ
saṃrarāṇāḥ payasā saṃ babhūvuḥ |
datto asmabhyaṃ draviṇeha bhadrā
apāṃ prati prati gṛhṇātv enāḥ ||

uc chrayasva bahur bhava
svena mahasā yava |
pṛṇīhi sarvā pātrāṇi
mā tvā divyāśanir vadhīt ||

āśṛṇvantaṃ yavaṃ devaṃ
yatra tvācchāvadāmasi |
tad uc chrayasva dyaur iva
samudra ivaidhy akṣitaḥ ||

akṣitās ta upasado
akṣitāḥ santu rāśayaḥ |
pṛṇanto akṣitāḥ santv
attāraḥ santv akṣitāḥ ||

sakṛd yad dyaur ajāyata
sakṛd bhūmir ajāyata |
sakṛd yaḥ pṛśniyā dugdhaṃ
tad anyo nānu jāyate
mā tvānu jani kaś cana ||

iṣvagram iṣuyāvanaṃ
maṇiṃ kṛṇve sumaṅgalam |
sa mā śaravyābhyaḥ pātu
divānaktaṃ ca jīvase ||

pratiṣṭhito 'si brahmaṇā
jambhayāmasi tvā vayam |
apāmārgeṇa vidvalā
idaṃ tvāpa mṛjmahe
yuvantaṃ kṣipantaṃ jahi ||

śīrṇaṃ ta etan na kṣutaṃ ta etat
saṃkṣutaṃ duḥkṣutaṃ tubhyam astu |
rudrāśaniṣ ṭe jaghanena grīvā
indra iva vṛtraṃ vajreṇa hantu ||

anuhavaṃ parihavaṃ
parivādaṃ parikṣavam |
savyermaṃ riktakumbhāṃ
parā tāṃ savitaḥ suva ||

apapāpaṃ parikṣavaṃ
puṇyaṃ bhakṣīmahi kṣavam |
śivā te pāpanāsikāṃ
parṇakaś cābhi mehatām ||