Paippalāda-Saṃhitā · Chapter 20.42

yad adya dugdhaṃ pṛthivīm asakta
yad oṣadhīr vyasarad yad āpaḥ |
vatse payo gavi payo yad asyām
asmāṃs tat sacatāṃ payaḥ ||

parā patanty āśavo
'śvā adhodhuraṃ yathā |
evā mūtra pra bhidyasva
vi vaster āsyaṃ sṛja ||

viṣitaṃ te vastibilam ity ekā ||

asya pāre samudrasya
śukraṃ jyotir amartyam |
tan naḥ pātv aṃhasas
tan naḥ pātu viśvataḥ ||

ā no medhā sumatir viśvarūpā
hiraṇyavarṇā jagatī jagamyāt |
sā no agne medhā
juṣatām iha pracetāḥ ||

niṣ krāmatv iṣiryo atra praviṣṭo
vayāṣṭhaś ca sayujā yāv iha staḥ |
sapta ṛṣīṇāṃ syūmaraśmiḥ pathaitu
svān mṛgān punar apy etu kṛṣṇaḥ ||

sapta ṛṣīn gaccha syūmaraśmaye
mṛgān kṛṣṇaḥ sacatāṃ vājo aśvam |
īḍo asmān suprajasaḥ suvīrān
saha yajñena payasā sacātai ||

namo astv ṛṣaye syūmaraśmaye
namaḥ kṛṣṇāyota yo vājo asya |
namo devāyārvateṣu jiṣṇave
'yaṃ no vājī pra tirāty āyuḥ ||

ati yanty ahāny ati rātrīr aty uṣasaḥ |
āpo antardhāvarīs tābhir antar dadhe tvā ||

yathā naidāghye māsi
bahvīḥ śuṣyanty oṣadhīḥ |
evā pra śuṣya mām anu
yac ca paśyāmi yac ca na ||

pāṭā bibharty aṅkuśaṃ
hiraṇyavantam aṅkinam |
tenāham anyeṣāṃ striya
ā lumpāmi mamed asan ||