પૈપ્પલાદ-સંહિતા · અધ્યાય 20.40

અઘમારમ્ અઘશંસં નિરૃથં
દુર્હાર્દે દન્તં પ્ર હિણોમિ ઘોરમ્ ।
સો અસ્યાત્તુ દ્વિપદશ્ ચતુષ્પદઃ
શિવો અસ્મભ્યં સુમના અસ્ત્વ્ એષઃ ॥

શિવં તે દન્તં હવિષા કૃણોમિ
શિવો મહ્યં કુર્વતે દન્તો અસ્તુ ।
શિવાનિ તે ત્રીણિ ત્રિકદ્રુકાણિ સન્તુ
શિવો મહ્યં નભસી રોદસી સ્તામ્ ॥

પુરુરૂપા પૃથુપેશા
અરંકૃદ્ વહતોર્ અસિ ।
પ્રતિષ્ઠાસિ ચતુષ્પદાં
યસ્ ત એષ પઞ્ચમઃ પાદસ્
તં તેન પ્રતિ ગૃહ્ણામિ ॥

સસર્પરીર્ અમતિં બાધમાના
બૃહન્ મિમાય જમદગ્નિદત્તા ।
આ સૂર્યસ્ય દુહિતા તતાન
શ્રવો દેવેષ્વ્ અમૃતમ્ અજુર્યમ્ ॥

સસર્પરીર્ અભરત્ તૂયમ્ એભ્યો
ઽધિ શ્રવઃ પાઞ્ચજન્યાસુ કૃષ્ટિષુ ।
સા પક્ષ્યા નવ્યમાયુર્ દધાના
યાં મે પુલસ્તિ જમદગ્નયો દદુઃ ॥

અઘ્ન્યે દૂરમૂત્ કન્દ
નિ પદશ્ ચતુરો જહિ ।
અધા ગોદુહઃ શીર્ષણિ
શફાઁ ઉરસિ વાદય ॥

શૃઙ્ગાભ્યામ્ ઉપ સ્રષ્ટારં
પદાવર્તય ગોદુહમ્ ।
અથો યે અન્યે તિષ્ઠન્તિ
તાન્ વિષૂચો વિ નાશય ॥

યથા નર્તા સક્ષિકાજિં
નિ કુલ્ફમ્ અભિનૃત્યતિ ।
એવા ત્વમ્ અઘ્ન્યે પદઃ
સર્વાન્ સાકમ્ ઉદ્ અર્દય ॥

ઉદ્ ઉ ક્ષીરમ્ ઉત્તભિતં
સ્યન્દન્તામ્ અસ્ય ધેનવઃ ।
અસૃક્ તસ્ય ગાવો દુહ્રાં
યો અસ્માન્ નાપચાયતિ ॥

ઋક્ષીકાયા યથા મનો
વ્યાઘ્રસ્ય યથા મનઃ ।
એવા તસ્ય ગવાં મનો
યો અસ્માન્ નાપચાયતિ ॥