Paippalāda-Saṃhitā · Chapter 20.33
yat te devā akṛṇvan bhāgadheyam
amāvāsye saṃvasanto mahitvā |
semaṃ yajñaṃ pipṛhi viśvavāre
rayiṃ no dhehi subhage suvīram ||
ghṛtaṃ te agne divye sadhasthe
ghṛtena tvā manur adyā sam īdhe |
ghṛtaṃ te devā āpyā vahanti
ghṛtaṃ tubhyaṃ duhrate gāvo agre ||
mayy agre agniṃ gṛhṇāmi
saha kṣatreṇa varcasā balena |
mayi prajāṃ mayy āyur dadhāmi
svāhā mayy agniḥ ||
apsu te rājan varuṇa
gṛho mito hiraṇyayaḥ |
tato dhṛtavrato rājā
sarvā dhāmāni no muceḥ ||
dhāmnodhāmno rājann
ito varuṇa no muceḥ ||
yad āpo aghnyā iti
varuṇeti yad ūcima |
tato varuṇa no muceḥ ||
yo rudro agnau yo apsv antar
ya oṣadhīr vīrudha āviveśa |
ya imā viśvā bhuvanāni cākl̥pe
tasmai rudrāya namo astv adya ||
apehy arir asy arir vā asi |
viṣe viṣam apṛkthā
ahim evābhy apehi taṃ jahi ||
pṛtanājitaṃ sahamānam agnim
ugraṃ huvema paramāt sadhasthāt |
sa naḥ parṣad ati durgāṇi viśvahā
kṣāsad devo 'ti duritāny agniḥ ||
yady antarikṣe yadi vāta āsa
yadi vṛkṣeṣu yadi volapeṣu
yad aśravan paśava udyamānaṃ
tad brāhmaṇaṃ punar asmān upaitu ||
Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0