Paippalāda-Saṃhitā · Chapter 20.28

yad apsu te sarasvati
goṣv aśveṣu yan madhu |
tena no vājinīvati
mukham aṅdhi sarasvati varcasā ||

yo adya deva sūrya
tvāṃ ca māṃ cāntarāyati |
tasmin duṣvapnyaṃ sarvaṃ
duritāni ca mṛjmahe ||

yo no +'bhicchāyaṃ martyeṣv
agniṃ tiṣṭhasy antarā |
tasya vṛścāmi te mūlaṃ
na cchāyāṃ karavo 'param ||

ghnantv enaṃ deveṣavo
brahmāṇo ghnantu menyā |
yo asmākaṃ prajāpate
agniṃ tiṣṭhaty antarā ||

prajāpate yo 'smām̐ ādṛś-
-āgniṃ tiṣṭhaty antarā |
taṃ mṛtyave pra yacchāmi
sa rudrasyāstv ākhaṇaḥ ||

pra suvainaṃ devavajrebhyo
mṛtyur vi kramatām adhi |
sinātv enān nirṛtir
mṛtyoḥ pāśair bandhair avimokyaiḥ ||

sumaṅgalena vacasā
keśin grāmaṃ na ā vada |
brahmaṇābrahmaṇā tv-
-olūkācchā vadāmasi ||

parāṅ eva parā vada
parācīm anu saṃvatam |
yathā yamasya tvā gṛhe
'rasaṃ praticākaśaṃ
niyastaṃ praticākaśam ||

śunam ulūka no vada
yaṃ dviṣmas tam ito naya |
rājño yamasya te gṛhe
sikatābhir videvyam
ākhus te mūṣiked bhāgaḥ ||

ā vada bahulaṃ goṣṭhaṃ
dhītavatsam anaṣṭagum |
dhvāṅkṣāya dvipadāṃ vada
śune catuṣpadāṃ vada ||