પૈપ્પલાદ-સંહિતા · અધ્યાય 20.23

વાસ્તોષ્પત ઇહ નઃ શર્મ યચ્છ
ભદ્રાચ્ છ્રેયો અભિ નો નેષ વસ્યઃ ।
અરિષ્ટા વીરા ઇહ મે ભવન્તુ
દ્વિપાચ્ ચતુષ્પાન્ મય્ય્ અસ્તુ પુષ્ટમ્ ॥

અનમીવો વાસ્તોષ્પતે
વિશ્વા રૂપાણ્ય્ આવિશન્ ।
સખા સુશેવ એધિ નઃ ॥

ઋતેન સ્થૂણા અધિ રોહ વંશ્-
-ઓગ્રો વિરાજન્ન્ અપ વૃઙ્ક્ષ્વ શત્રૂન્ ।
મા તે રિષન્ન્ ઉપસત્તારો અત્ર
વિરાજાં જીવાચ્ છરદઃ શતાનિ ॥

આ રોહતં પક્ષાવ્ અમૃતં વસાનૌ
દમ્પત્યોઃ કૃણુતં દીર્ઘમ્ આયુઃ ।
તત્ર નારી પુત્રિણી જીવપત્ન્-
-ઈદં કુલાયમ્ ઉપસંવિશાતિ ॥

અગ્નિર્ મા વિશ્વાદ્ દુરિતાત્ પુનાતુ
માતરિશ્વા પવમાનઃ પુરસ્તાત્
સોમો મા પાતુ મરુતો બૃહસ્પતિર્
વાયુશ્ ચ મા પવમાનઃ પુનીતામ્ ॥

ત્વયા સત્યં વિ જયન્તે
તવ સત્યં વિવાચનમ્ ।
અગ્રે વૃક્ષસ્ય જાયસે
સેમં જનય પૂરુષમ્ ॥

વૃક્ષસ્ય શતશાખસ્ય
માધુન્તસ્ય નિકૃત્વનઃ ।
વિભીદકસ્ય યત્ ફલં
તેન ત્વોન્ માદયામસિ ॥

પૂર્વે વાતાત્ પ્ર પતતં
પૂર્વે પતતમ્ અશ્વિભ્યામ્ ।
ઇમે ન્યર્વણી અહમ્
ઉદ્નેવાગ્નિમ્ અવીવરે ॥

મા યક્ષ્મમ્ ઇહ હાસિષ્ટ
મા રિફન્તો વિ ગાતન ।
સુભૂતમ્ અસ્મભ્યં ધત્ત
યુષ્માન્ અન્વ્ એતુ કિલ્બિષમ્ ॥

ઇહ વર્ચ ઇહ પય
ઇહ ચક્ષુર્ ઉપ હ્વયે ।
ઇહેન્દ્રિયં દધાતન ॥