પૈપ્પલાદ-સંહિતા · અધ્યાય 20.2

અયા વિષ્ઠા જનયન્ કર્વરાણિ
સ હિ ઘૃણિર્ ઉરુર્ વરાય ગાતુઃ ।
સ પ્રત્ય્ ઉદ્ ઐદ્ વરુણો મધ્વો અગ્રં
સ્વાં યત્ તનૂં તન્વામ્ ઐરયત ॥

યજ્ઞેન યજ્ઞમ્ અયજન્ત દેવાસ્
તાનિ ધર્માણિ પ્રથમાન્ય્ આસન્ ।
તે હ નાકં મહિમાનઃ સચન્તે
યત્ર પૂર્વે સાધ્યાઃ સન્તિ દેવાઃ ॥

યજ્ઞો બભૂવ
સ આ બભૂવ
સ પૃથિવ્યા અધિપતિર્ બભૂવ ।
સ પ્ર જજ્ઞે સ ઉ વાવૃધે પુનઃ
સો અસ્માસુ દ્રવિણમ્ આ દધાતુ ॥

દેવા યદ્ દેવાન્ હવિષાયજન્ત્-
-આમર્તિયાન્ મનસામર્ત્યેન ।
બ્રવામ તત્ર પરમે વ્યોમન્
વદેમ તદ્ ઉદિતૌ સૂર્યસ્ય ॥

મુગ્ધા દેવા ઉત શુનાયજન્ત્ -
-ઓત ગોર્ અઙ્ગૈર્ બહુધાયજન્ત ।
ય ઇમં યજ્ઞં મનસાન્વવિન્દત્
પ્ર ણો વોચત્ તમ્ ઇહેહ બ્રવામ ॥

યત્ પુરુષેણ હવિષા
દેવા યજ્ઞમ્ અતન્વત ।
ક્વ સ્વિત્ તદ્ અદ્ય નો બ્રૂયાદ્
યદિ હવ્યેનેજિરે ॥

ઇન્દ્રઃ સુત્રામા સ્વવાઁ અવોભિઃ
સુમૃડીકો ભવતુ વિશ્વવેદાઃ ।
બાધતાં દ્વેષો અભયં કૃણોતુ
સુવીર્યસ્ય પતયઃ સ્યામ ॥

સ સુત્રામા સ્વવાઁ ઇન્દ્રો અસ્મદ્
આરાચ્ ચિદ્ દ્વેષઃ સનુતર્ યુયોત ।
તસ્ય વયં સુમતૌ યજ્ઞિયસ્ય્ -
-આપિ ભદ્રે સૌમનસે સ્યામ ॥

યસ્ તે પૃથુ સ્તનયિત્નુર્ ય ઋષ્વો
યો દૈવઃ કેતુર્ વિશ્વમ્ આભૂષતીદમ્ ।
મૃડયા નો વિદ્યુતા દેવ સસ્યાય
મોત વધી રશ્મિભિઃ સૂર્યસ્ય ॥

યસ્ તે સ્તનઃ શસયુર્ યો મયોભૂર્
યઃ સુમ્નયુઃ સુહવો યઃ સુદક્ષઃ ।
યેન વિશ્વા વનસિ વાર્યાણિ
સરસ્વતી તમ્ ઇહ ધાતવે કઃ ॥