Paippalāda-Saṃhitā · Chapter 20.11

ati dhanvāny aty apas tatarda
śyeno nṛcakṣā avasānadarśaḥ |
taran viśvāvarā rajāṃs-
-īndreṇa sakhyā śiva ā jagāma ||

āgan devaḥ savitā sarvadhāyā
urujyotir avidāmā namobhiḥ |
mahīṃ nāvam aditer ā ruhema
yatra somaḥ sadam it tatra bhadram ||

ud vayam ity ekā ||

patir divaḥ patir agniḥ pṛthivyāḥ
patir viśvasya bhuvanasya rājati |
patir viśvā oṣadhīr ā viveśa
patnīvān agna iha yāhi somam ||

saṃ krāmataṃ mā jahītaṃ śarīraṃ
prāṇāpānau sayujeha stam |
saptaṛṣibhyaḥ pari dadma etaṃ
ta enaṃ svasti jarase nayantu ||

yat ta āyur atihitaṃ parācair
apānaḥ prāṇo ya u te paretaḥ |
agniṣ ṭad āhār nirṛter upasthāt
tad ātmani punar ā veśayāmi ||

mā tvā prāṇo hāsīd yas tve praviṣṭo
mā tvāpāno 'vahāya parā gāt |
saṃrabhya jīva śaradaḥ suvarcā
agniṣ ṭe gopā adhipā vasiṣṭhaḥ ||

rākām ahaṃ suhavāṃ suṣṭutī huve
śṛṇotu naḥ subhagā bodhatu tmanā |
sīvyatv apaḥ sūcyācchidyamānayā
dadātu vīraṃ śatadāyam ukthyam ||

yās te rāke sumatayaḥ supeśaso
yābhir dadāti dāśuṣe vasūni |
tābhir no adya sumanā upāgahi
sahasrapoṣaṃ subhage rarāṇā ||

yā rākā yā sinīvālī
yā guṅgūr yā sarasvatī |
indrāṇīm ahva ūtaye
varuṇānīṃ svastaye ||

yā subāhuḥ svaṅguriḥ
suṣumā bahusūvarī |
tasyai viśpatnyai haviḥ
sinīvālyai juhotana ||

sinīvāli pṛthuṣṭuke
yā devānām asi svasā |
juṣasva havyam āhutaṃ
prajāṃ devi didiḍḍhi naḥ ||

yā viśvata indram asi pratīcī
sahasrastutām abhi yantu devīḥ |
viṣṇupatni tubhyaṃ rātā havīṃṣi
patiṃ devi rādhasā codayasva ||