Paippalāda-Saṃhitā · Chapter 19.49

indraṃ vayaṃ vaṇijo havāmahe
sa nas trātā pura etu prajānan |
ghnann arātiṃ paripanthinaṃ mṛgaṃ
sa īśāno dhanadā astu mahyam ||

paṇo no astu prapaṇo vikrayaś ca
pratipaṇo no dhaninaḥ kṛṇotu |
saṃrarāṇā āhutiṃ juṣantāṃ
śunaṃ no astu caritam utthitaṃ ca ||

yat paṇena pratipaṇaṃ carāmi
svena devā dhanam icchamānaḥ |
indro me tasmin rucam ā dadhātu
bṛhaspatiḥ savitā somo agniḥ ||

ye vaḥ panthā bahavo devayānā
anu dyāvāpṛthivī saṃcaranti |
teṣām ahaṃ māṃ varcasyā dadhāmi
yathā krītvā dhanam ā vahāni ||

viddhavāsase nirṛter
ye ca pāśā apaśritāḥ |
tebhyaḥ pra mucyate varmī
viṣkandham upa sādayan ||

na vai tad vāso bhavati
yasmin vidhyanti pūruṣam |
asnā samajyate rūpaṃ
tasmāt tad apalopyam ||

uttiṣṭhann apriyāyata-
-avidvān bahubhājyam |
na panthāṃ bhadram aśnute
ya enena carāt saha ||

brahmaṇaitat pratigṛhyaṃ
tena tat kṛṇute śivam |
ārkāt pramucyate pāśāt
tena dātā vi paśyati ||

yau vyāghrāv avarūḍhāv avāñcau
jighatsataḥ pitaraṃ mātaraṃ ca |
tau dantau brahmaṇā brahmaṇaspate
śivau kṛṇu tvam iha jātavedaḥ ||

vrīhim attaṃ yavam attaṃ
māṣam attam atho tilam |
sa vāṃ bhāgo nihito ratnadheyaṃ
mā hiṃsiṣṭaṃ pitaraṃ mātaraṃ ca ||

aghorau sayujā saṃvidānau
syonau dantau sumaṅgalau |
mā hiṃsiṣṭaṃ pitaraṃ mātaraṃ ca-
-anyatra vāṃ tanvo ghoram astu ||

enā yutām indrāgnī
rājñā somena medinā |
indro marutvān ādānam
amitrebhyaḥ kṛṇotu me ||

idam ādānam akaraṃ
tapasendreṇa saṃśitam |
amitrā yatra santi me
tān ādāṃ dviṣato mama ||

ādānena saṃdānena-
-amitrān saṃ dyāmasi |
apānā ye caiṣāṃ prāṇā
asunāsūn sam acchidam ||

pratūrtāya marutvate svāhā ||

jayadvīrāyābhiṣatvane svāhā ||

bṛhaspataye viśvadevāvate svāhā ||