પૈપ્પલાદ-સંહિતા · અધ્યાય 19.49

ઇન્દ્રં વયં વણિજો હવામહે
સ નસ્ ત્રાતા પુર એતુ પ્રજાનન્ ।
ઘ્નન્ન્ અરાતિં પરિપન્થિનં મૃગં
સ ઈશાનો ધનદા અસ્તુ મહ્યમ્ ॥

પણો નો અસ્તુ પ્રપણો વિક્રયશ્ ચ
પ્રતિપણો નો ધનિનઃ કૃણોતુ ।
સંરરાણા આહુતિં જુષન્તાં
શુનં નો અસ્તુ ચરિતમ્ ઉત્થિતં ચ ॥

યત્ પણેન પ્રતિપણં ચરામિ
સ્વેન દેવા ધનમ્ ઇચ્છમાનઃ ।
ઇન્દ્રો મે તસ્મિન્ રુચમ્ આ દધાતુ
બૃહસ્પતિઃ સવિતા સોમો અગ્નિઃ ॥

યે વઃ પન્થા બહવો દેવયાના
અનુ દ્યાવાપૃથિવી સંચરન્તિ ।
તેષામ્ અહં માં વર્ચસ્યા દધામિ
યથા ક્રીત્વા ધનમ્ આ વહાનિ ॥

વિદ્ધવાસસે નિરૃતેર્
યે ચ પાશા અપશ્રિતાઃ ।
તેભ્યઃ પ્ર મુચ્યતે વર્મી
વિષ્કન્ધમ્ ઉપ સાદયન્ ॥

ન વૈ તદ્ વાસો ભવતિ
યસ્મિન્ વિધ્યન્તિ પૂરુષમ્ ।
અસ્ના સમજ્યતે રૂપં
તસ્માત્ તદ્ અપલોપ્યમ્ ॥

ઉત્તિષ્ઠન્ન્ અપ્રિયાયત-
-અવિદ્વાન્ બહુભાજ્યમ્ ।
ન પન્થાં ભદ્રમ્ અશ્નુતે
ય એનેન ચરાત્ સહ ॥

બ્રહ્મણૈતત્ પ્રતિગૃહ્યં
તેન તત્ કૃણુતે શિવમ્ ।
આર્કાત્ પ્રમુચ્યતે પાશાત્
તેન દાતા વિ પશ્યતિ ॥

યૌ વ્યાઘ્રાવ્ અવરૂઢાવ્ અવાઞ્ચૌ
જિઘત્સતઃ પિતરં માતરં ચ ।
તૌ દન્તૌ બ્રહ્મણા બ્રહ્મણસ્પતે
શિવૌ કૃણુ ત્વમ્ ઇહ જાતવેદઃ ॥

વ્રીહિમ્ અત્તં યવમ્ અત્તં
માષમ્ અત્તમ્ અથો તિલમ્ ।
સ વાં ભાગો નિહિતો રત્નધેયં
મા હિંસિષ્ટં પિતરં માતરં ચ ॥

અઘોરૌ સયુજા સંવિદાનૌ
સ્યોનૌ દન્તૌ સુમઙ્ગલૌ ।
મા હિંસિષ્ટં પિતરં માતરં ચ-
-અન્યત્ર વાં તન્વો ઘોરમ્ અસ્તુ ॥

એના યુતામ્ ઇન્દ્રાગ્ની
રાજ્ઞા સોમેન મેદિના ।
ઇન્દ્રો મરુત્વાન્ આદાનમ્
અમિત્રેભ્યઃ કૃણોતુ મે ॥

ઇદમ્ આદાનમ્ અકરં
તપસેન્દ્રેણ સંશિતમ્ ।
અમિત્રા યત્ર સન્તિ મે
તાન્ આદાં દ્વિષતો મમ ॥

આદાનેન સંદાનેન-
-અમિત્રાન્ સં દ્યામસિ ।
અપાના યે ચૈષાં પ્રાણા
અસુનાસૂન્ સમ્ અચ્છિદમ્ ॥

પ્રતૂર્તાય મરુત્વતે સ્વાહા ॥

જયદ્વીરાયાભિષત્વને સ્વાહા ॥

બૃહસ્પતયે વિશ્વદેવાવતે સ્વાહા ॥