Paippalāda-Saṃhitā · Chapter 19.48

ā vada bahulaṃ goṣṭhaṃ
suvīraṃ bahupūruṣam |
yatheto na pramīyātā
evā me goṣṭham ā vada ||

ā vada duhituṣ pate
bhrātur jāmātar ā vada |
paścā ta udbhūtaḥ sphigaḥ
kiṣkindhānām avīr jahi ||

yad ulūko vadati mogham etad
yat kapotaḥ padam agnau kṛṇoti |
śrutakarṇāya kavaye stomyāya
tasmai yamāya namo astv adya ||

ya aindrāḥ pāśā ye ca vāruṇā
āre asmat tān devī nirṛtir dadhātu ||

ye vaiśvānarāḥ pāśā ye ca mārutā
āre asmat tān devī nirṛtir dadhātu ||

ye vaiśvadevāḥ pāśā ye ca vaiśvakarmaṇā
āre asmat tān devī nirṛtir dadhātu ||

nārade kitave varuṇe soma
aicchan mahimānaṃ mahāntam |
avindat taṃ viśvakarmā samudre
akṣāṇāṃ klandam ainam asmin dadhāmi ||

yad dhastayor yac cakṣuṣor
mano yat praviveśa te |
skandān asya praskandena
klandena klandayāmi tat ||

tisro devīr apsarasa ākaikā sākaikā pretaprayām ety ekasyā nāma |
juṣāṇā apsarasa ājyasya sahaso vyantu svāhā ||

atyākṣaṃ tvā manasā-
-atyākṣaṃ hṛdayena tvā |
atyākṣaṃ sarvair aṅgais tvā
tathā hi tyajanaṃ kṛtam ||

imā yāḥ prati nandatha
striyaḥ pumāṃsam anvitam |
sarvāḥ saṃgatya brūta
tejane tyajanaṃ kṛtam ||

tyajanaṃ me dyāvāpṛthivī adhātāṃ
tyajanaṃ devaḥ savitā bṛhaspatiḥ |
agniś ca tubhyaṃ sūryaś ca
tejane tyajanaṃ kṛtam ||

saṃ divaḥ saṃ pṛthivyāḥ
saṃ vātāt saṃ nadībhyaḥ |
saṃskandam indra ābharat
sa āgāt so 'gād idam ||

saṃskandam oja ojasā
devebhir nāma te hitam |
hiraṇyanāma nāma te
saṃskandāsy oṣadhe ||

saṃ samudro nadībhiḥ
saṃ dyāvāpṛthivī ubhe |
saṃ jāyā patyā yonyāṃ
saṃskandāsy oṣadhe ||

saṃ te śīrṣṇaḥ kapālāni
saṃ yoniṃ saṃgavīnyau |
saṃ te sarvāṇy aṅgāni
saṃ skandenābhi dadhmasi ||

śriyaṃ dhātur mayi dhehi
śriyā mādhipatiṃ kṛṇu |
viśām īśāno maghavān
indro mā yaśasā nayat ||

mayi tyad indriyaṃ bṛhan
mayi dakṣa uta kratuḥ |
gharmas triś cid vi bhātu mā
gāyatrīcchandasā virāḍjyotiṣā
tasya doham aśīya ||

arkāsadhasthau kavimātariśvānau yamāṅgirasaḥ |
yaśasvinaṃ mā devā yaśasaḥ kṛṇuta svāhā ||