Paippalāda-Saṃhitā · Chapter 19.45

prāgnaye vācam īraya
vṛṣabhāya kṣitīnām |
sa naḥ parṣad ati dviṣaḥ ||

yaḥ parasyāḥ parāvatas
tiro viśvābhirocate |
sa naḥ parṣad ati dviṣaḥ ||

yo rakṣāṃsi nijūrvaty
agniḥ śukreṇa śociṣā |
sa naḥ parṣad ati dviṣaḥ ||

yo viśvābhi vipaśyati
bhuvanā saṃ ca paśyati |
sa naḥ parṣad ati dviṣaḥ ||

madhu vātā ṛtāyate
madhu kṣaranti sindhavaḥ |
mādhvīr gāvo bhavantu naḥ ||

madhu naktam utoṣaso
madhumat pārthivaṃ rajaḥ |
mādhvīr naḥ santv oṣadhīḥ ||

madhumān no vanaspatir
madhumām̐ astu sūryaḥ |
madhu dyaur astu naḥ pitā ||

āpo hi ṣṭhā mayobhuvas
tā na ūrje dadhātana |
mahe raṇāya cakṣase ||

yo vaḥ śivatamo rasas
tasya bhājayateha naḥ |
uśatīr iva mātaraḥ ||

tasmā araṅgamāma vo
yasya kṣayāya jinvatha |
āpo janayathā ca naḥ ||

āyaṃ gauḥ pṛśnir akramīd
asadan mātaraṃ punaḥ |
pitaraṃ ca prayaṃtsvaḥ ||

asya prāṇād apānaty
antaś carati rocanā |
vy akhyan mahiṣo divam ||

triṃśad dhāma vi rājati
vāk pataṅgāya śiśriyat |
prati vastor aha dyubhiḥ ||

yac chakrā vācam āruhann
antarikṣaṃ siṣāsantaḥ |
saṃ devā amadan vṛṣā ||

śakro vācam adhiṣṭhāya -
-uruvāco asṛṣṭa hi |
mahiṣā amadan divi ||

śakro vācam asṛṣṭa hi
dhāmadharman vi rājati |
vimadaṃ barhir ā sarat ||