पैप्पलाद-संहिता · अध्याय 19.45
प्राग्नये वाचम् ईरय
वृषभाय क्षितीनाम् ।
स नः पर्षद् अति द्विषः ॥
यः परस्याः परावतस्
तिरो विश्वाभिरोचते ।
स नः पर्षद् अति द्विषः ॥
यो रक्षांसि निजूर्वत्य्
अग्निः शुक्रेण शोचिषा ।
स नः पर्षद् अति द्विषः ॥
यो विश्वाभि विपश्यति
भुवना सं च पश्यति ।
स नः पर्षद् अति द्विषः ॥
मधु वाता ऋतायते
मधु क्षरन्ति सिन्धवः ।
माध्वीर् गावो भवन्तु नः ॥
मधु नक्तम् उतोषसो
मधुमत् पार्थिवं रजः ।
माध्वीर् नः सन्त्व् ओषधीः ॥
मधुमान् नो वनस्पतिर्
मधुमाँ अस्तु सूर्यः ।
मधु द्यौर् अस्तु नः पिता ॥
आपो हि ष्ठा मयोभुवस्
ता न ऊर्जे दधातन ।
महे रणाय चक्षसे ॥
यो वः शिवतमो रसस्
तस्य भाजयतेह नः ।
उशतीर् इव मातरः ॥
तस्मा अरङ्गमाम वो
यस्य क्षयाय जिन्वथ ।
आपो जनयथा च नः ॥
आयं गौः पृश्निर् अक्रमीद्
असदन् मातरं पुनः ।
पितरं च प्रयंत्स्वः ॥
अस्य प्राणाद् अपानत्य्
अन्तश् चरति रोचना ।
व्य् अख्यन् महिषो दिवम् ॥
त्रिंशद् धाम वि राजति
वाक् पतङ्गाय शिश्रियत् ।
प्रति वस्तोर् अह द्युभिः ॥
यच् छक्रा वाचम् आरुहन्न्
अन्तरिक्षं सिषासन्तः ।
सं देवा अमदन् वृषा ॥
शक्रो वाचम् अधिष्ठाय -
-उरुवाचो असृष्ट हि ।
महिषा अमदन् दिवि ॥
शक्रो वाचम् असृष्ट हि
धामधर्मन् वि राजति ।
विमदं बर्हिर् आ सरत् ॥
मूल पाठ: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0