Paippalāda-Saṃhitā · Chapter 19.44

syūtā devebhir amṛtair na āgann
ukhā svasāram adhi me dimasthāt |
satyaṃ pūrvā ṛṣayaś cākṛpānā
yajñapateḥ su pra tirantv āyuḥ ||

ukhāṃ sravantīm agadām akarma
tvaṣṭā vāyuḥ pṛthivy antarikṣam |
yata ścutad dhutam agnau tad astu
na tat prāpnoti nirṛtiḥ parastāt ||

antar agnāv aścutat stoka eṣa
nainaṃ suvātai nirṛtiḥ parastāt |
viśvāvasor haviṣo vāvṛdhāno
'yaṃ yajñaḥ sukṛtām etu lokam ||

śyeno 'si gāyatracchandā anu tvā rabhe
svasti mā saṃ pāraya ||

samrāḍ asi triṣṭupchandā anu tvā rabhe
svasti mā saṃ pāraya ||

svaro 'si gayo 'si jagacchandā anu tvā rabhe
svasti mā saṃpāraya ||

trāyamāṇe sarvavide mā pari dehi |
sarvavid dvipāc ca sarvaṃ
rakṣa catuṣpād yac ca naḥ svam ||

sarvavid viśvavide mā pari dehi |
viśvavid dvipāc ca sarvaṃ
rakṣa catuṣpād yac ca naḥ svam ||

viśvavit kalyāṇyai mā pari dehi |
kalyāṇi dvipāc ca sarvaṃ
rakṣa catuṣpād yac ca naḥ svam ||

kalyāṇi trāyaṃāṇāyai mā pari dehi |
trāyamāṇe dvipāc ca sarvaṃ
rakṣa catuṣpād yac ca naḥ svam ||

vi khana vi ruja vi jahy
atraivānākṛtaś cara |
sam aham āyuṣā saṃ mayāyuḥ ||

vi khana vi ruja vi jahy
atraivānākṛtaś cara |
sam ahaṃ varcasā saṃ mayā varcaḥ ||

vi khana vi ruja vi jahy
atraivānākṛtaś cara |
sam ahaṃ tejasā saṃ mayā tejaḥ ||

vi khana vi ruja vi jahy
atraivānākṛtaś cara |
sam ahaṃ prajayā saṃ mayā prajā ||

vi khana vi ruja vi jahy
atraivānākṛtaś cara |
sam ahaṃ paśubhiḥ saṃ mayā paśavaḥ ||

divo reto 'si pṛthivyā nabhyam |
nabhyam asi nabhyaṃ mā kṛṇu ||

divo reto 'si pṛthivyāḥ śaktiḥ |
śaktir asi śaktaye te vidheyam ||

divo reto 'si pṛthivyā vittiḥ |
vittir asi vittaye te vidheyam ||

divo reto 'si pṛthivyāḥ puṣṭiḥ |
puṣṭir asi puṣṭaye te vidheyam ||

divo reto 'si pṛthivyā bhūtiḥ |
bhūtir asi bhūtaye te vidheyaṃ
bhūtir asi bhūtāsi bhūyāsam ||

śukro 'si bhrājo 'si |
sa yathā tvaṃ bhrājato bhrājo 'sy
evāhaṃ bhrājato bhrājyāsam ||

sāyaṃsāyaṃ gṛhapatir no agniḥ
prātaḥprātaḥ saumanasasya dātā |
vasorvasor vasudhāna edhi
vayaṃ tvendhānās tanvaṃ puṣema ||

prātaḥprātar gṛhapatir no agniḥ
sāyaṃsāyaṃ saumanasasya dātā |
vasorvasor vasudhāna edhi-
-indhānās tvā śataṃ himā ṛdhema ||

yo na āviḥ śapati yaś ca stāyad
yadi cittyā manyunā yat sapatnaḥ |
agniṣ ṭān pāśān pra mumoktu devo
yāvayatu śapathām̐ varuṇo dhṛtavrataḥ ||