પૈપ્પલાદ-સંહિતા · અધ્યાય 19.45
પ્રાગ્નયે વાચમ્ ઈરય
વૃષભાય ક્ષિતીનામ્ ।
સ નઃ પર્ષદ્ અતિ દ્વિષઃ ॥
યઃ પરસ્યાઃ પરાવતસ્
તિરો વિશ્વાભિરોચતે ।
સ નઃ પર્ષદ્ અતિ દ્વિષઃ ॥
યો રક્ષાંસિ નિજૂર્વત્ય્
અગ્નિઃ શુક્રેણ શોચિષા ।
સ નઃ પર્ષદ્ અતિ દ્વિષઃ ॥
યો વિશ્વાભિ વિપશ્યતિ
ભુવના સં ચ પશ્યતિ ।
સ નઃ પર્ષદ્ અતિ દ્વિષઃ ॥
મધુ વાતા ઋતાયતે
મધુ ક્ષરન્તિ સિન્ધવઃ ।
માધ્વીર્ ગાવો ભવન્તુ નઃ ॥
મધુ નક્તમ્ ઉતોષસો
મધુમત્ પાર્થિવં રજઃ ।
માધ્વીર્ નઃ સન્ત્વ્ ઓષધીઃ ॥
મધુમાન્ નો વનસ્પતિર્
મધુમાઁ અસ્તુ સૂર્યઃ ।
મધુ દ્યૌર્ અસ્તુ નઃ પિતા ॥
આપો હિ ષ્ઠા મયોભુવસ્
તા ન ઊર્જે દધાતન ।
મહે રણાય ચક્ષસે ॥
યો વઃ શિવતમો રસસ્
તસ્ય ભાજયતેહ નઃ ।
ઉશતીર્ ઇવ માતરઃ ॥
તસ્મા અરઙ્ગમામ વો
યસ્ય ક્ષયાય જિન્વથ ।
આપો જનયથા ચ નઃ ॥
આયં ગૌઃ પૃશ્નિર્ અક્રમીદ્
અસદન્ માતરં પુનઃ ।
પિતરં ચ પ્રયંત્સ્વઃ ॥
અસ્ય પ્રાણાદ્ અપાનત્ય્
અન્તશ્ ચરતિ રોચના ।
વ્ય્ અખ્યન્ મહિષો દિવમ્ ॥
ત્રિંશદ્ ધામ વિ રાજતિ
વાક્ પતઙ્ગાય શિશ્રિયત્ ।
પ્રતિ વસ્તોર્ અહ દ્યુભિઃ ॥
યચ્ છક્રા વાચમ્ આરુહન્ન્
અન્તરિક્ષં સિષાસન્તઃ ।
સં દેવા અમદન્ વૃષા ॥
શક્રો વાચમ્ અધિષ્ઠાય -
-ઉરુવાચો અસૃષ્ટ હિ ।
મહિષા અમદન્ દિવિ ॥
શક્રો વાચમ્ અસૃષ્ટ હિ
ધામધર્મન્ વિ રાજતિ ।
વિમદં બર્હિર્ આ સરત્ ॥
મૂળ પાઠ: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0