Paippalāda-Saṃhitā · Chapter 19.43

pratīkaṃ me vicakṣaṇam
akṣau me madhukāśinī |
karṇābhyāṃ bhūrisusravaḥ ||

jihvā me madhusaṃsrāvā
jihvā me madhuvādinī |
tayāham adya jihvayā-
-udyāsaṃ madhumad vacaḥ ||

yathā madhu madhukṛtaḥ
saṃbharanti madhāv adhi |
evāham adya chandobhir
udyāsaṃ madhumad vacaḥ ||

vāyoḥ pūtaḥ pavitreṇa
pratyak somo adhiśritaḥ |
indrasya yujyaḥ sakhā ||

yat kiñ cedaṃ varuṇa daivye jane
abhidrohaṃ manuṣyāś caranti |
ati cet tava dharmā yuyopima
mā nas tasmād enaso deva rīriṣaḥ ||

āpo asmān mātaraḥ sūdayantu
ghṛtena no ghṛtapavaḥ punantu |
viśvaṃ hi ripraṃ pravahanti devīr
ud id ābhyaḥ śucir ā pūta emi ||

mitraś ca samrāḍ varuṇaś ca rājā
tau te bhakṣaṃ kṛṇutāṃ prātar agne |
tayor aham anu bhakṣaṃ kṛṇomi
sūryavarcā bhaga bhakto na ā viśa ||

sūryavarcā na ā viśa
viśvavin manasas patiḥ |
anehā soma jāgṛvir
indraḥ prīta stuto nṛbhiḥ ||

indra prītasya te vayaṃ
śukrasya rocanāvataḥ |
bhakṣīmahi prajām iṣaṃ
sāhasrasya yaśasvinaḥ ||

agniḥ prātaḥsavane pātv asmān
vaiśvānaraḥ pathikṛd viśvakṛṣṭiḥ |
sa naḥ pāvako draviṇe dadhāty
āyuṣmantaḥ sahabhakṣāḥ syāma ||

viśve devā maruta indro asmān
asmin dvitīye savane na jahyuḥ |
āyuṣmantaḥ priyam eṣāṃ vadanto
vayaṃ devānāṃ sumatau syāma ||

idaṃ tṛtīyaṃ savanaṃ kavīnām
ṛtena yac camasaṃ samairayan |
saudhanvanā amṛtam ānaśānāḥ
sviṣṭin no abhi vasyo nayātha ||

saṃ saṃ sravantu nadyaḥ
saṃ vātāḥ saṃ patatriṇaḥ |
yajñam imaṃ vardhayatā giraḥ
saṃsrāvyeṇa haviṣā juhomi ||

imaṃ homā yajñam avata-
-imaṃ saṃsrāvaṇā uta |
yajñam imaṃ vardhayatā giraḥ
saṃsrāvyeṇa haviṣā juhomi ||

rūpaṃrūpaṃ vayovayaḥ
saṃrabhyainaṃ pari ṣvaje |
yajñam imaṃ catasraḥ pradiśo vardhayantu
saṃsrāvyeṇa haviṣā juhomi ||