Paippalāda-Saṃhitā · Chapter 19.39

yā triṣaptaiḥ punar eti
nānā rūpāṇi bibhratī |
vācaspatir balā tasyā
āre hetiṃ dadhātu mat ||

vācā nuttā kṛtyād indravatī
jāgratā svapatī kṛtā |
nuttā pākasya śaṃsena
pratyak kartāram ṛcchatu ||

yad etad bhūri spardhase
kṛtyāsmīti manyase |
pratīcīnā paretya
viṣād iva viṣamad dhataḥ ||

pareṇaitv aghaśaṃso
mainena sam arāmahi |
dyauś cāsmān pṛthivī ca-
-ubhe pātām aṃhasaḥ ||

yava yāvayāsmad dveṣāṃsi
yavamayena haviṣā |
durhārde cakruṣe kṛtyāṃ
grīvāsu prati muñcatam ||

anyā vo anyām avatv
anyānyasyā upāvata |
aśvā iva pravalgantīḥ
kṛtyāṃ hatauṣadhayo
'rātiṃ hatauṣadhayaḥ ||

mehopa gā mopa raṃsthāḥ
pathāṃ durgāṇy anv ihi |
sapatni naśyatād ito
dūraṃ gacchādhy okasaḥ ||

yasyās te nāma gṛhnāmi
yasminn āramasecane |
ā parasyāḥ parāvataḥ
sapatnīṃ nāśayāmasi ||

triṃśataṃ trīṃś ca parvatāṃś
caturaś ca girīn ati |
sapatnīṃ brahmaṇaspate
paro bhrūṇāny arpayā ||

un mādayata marutaḥ samudriyā
ud dyāvāpṛthivī ubhe |
ut tvā samudra ṛṣantu -
-ut tvām agnir ayaṃ dahāt ||

yat sapatnī sapatnyā
amuṣyā varca ādade |
adhastād upavādiny
asau syād aham uttarāt ||

ā te badhnāmy oṣadhiṃ
sapatnībhyaḥ pracātanīm |
yathā te 'sad ayaṃ patiḥ
putrāṇāṃ te bhavat pitā ||

yāny ṛṇāny anuvartāny asmin
yamasya yena balinā carāmi |
idaṃ tad agne anṛṇo bhavāmi-
-idaṃ tad agne avadānam astu ||

yās te sapta pravato yā u tisro
yās te santi nivato yā abhīvataḥ |
arvāvato aṣṭadhā trīṇi rocanā
tās te agne saṃmanaso bhavantu
jānan yamāya ni vahā kusīdam ||

yās ta ūrdhvās tanvo jātavedo
yās tiraścīr uta yā anūcīḥ |
tābhiṣ ṭvam agne sayujā gṛṇāno
jānan yamāya ni vahā kusīdam ||