Paippalāda-Saṃhitā · Chapter 19.40

nāśaya palitaṃ śīrṣṇo
yaḥ kṛṣṇas tan na ā bhara |
tam oṣadhe tvaṃ vardhaya
keśaṃ kṛṣṇataraṃ kṛdhi ||

yathāñjanaṃ tathāsasi
yathā traikakudaṃ tathā |
tat saṃbhavāt tat sabhas te
vyucchantīr anūṣasaḥ ||

yatrāsti yatra tiṣṭhati
yato naśyatvāsinam |
divyaḥ suparṇo abravīd
etat palitabheṣajam ||

divo nu mā bṛhato antarikṣād
apāṃ stoko abhy apaptad rasāya |
sam indriyeṇa payasāham agne
ṛṣīṇāṃ yajñaiḥ sukṛtāṃ kṛtena ||

yadi vṛkṣād abhy apaptat phalaṃ tad
yady antarikṣāt tad u vāyur eva |
yatrāspṛṣṭa tanvo yatra vāsaso
na tat prāpnoti nirṛtiḥ parastāt ||

abhyañjanaṃ surabhyād u vāsaś
candraṃ hiraṇyam adhi pūtrimaṃ yat |
sarvā pavitrā vitatādhy asmiṃc
chataṃ jīvāti śaradas tavāyam ||

yaḥ kīkasāḥ praśṛṇāti
talīḍyam upatiṣṭhati |
parāsthaṃ sarvaṃ jāyānyaṃ
yaḥ kaś ca kakubhi śritaḥ ||

pakṣī jāyānyaḥ patati
ya āviśati pūruṣam |
tasyāhaṃ veda te nāma
yato jāyānya jāyase ||

veda vai te nāma
yato jāyānya jāyase |
kathaṃ hi tatra tvaṃ hanyā
yat kuryām ahaṃ haviḥ ||

ya āsyaṃ praviśati
karoty udaraṃ mahat |
yakṣmo yo atra jāyase
taṃ jāyānyam anīnaśam ||

ārohān me mukhaṃ jātam
ārohāj jaghanaṃ mama |
ārohāt sarvā jātāsmy
ṛṣabhasyopayodhanāt ||

svādīyasī surāyā
lavaṇāc cārumattarā |
gobhyo vanīyasīd aham ||

yāṃ tvā vāto 'vārayad
ārdranābhā maharṣabhaḥ |
tasyās te devi pṛthivyā
ahaṃ saṃvananaṃ dada
ā te śauṣkāsyaṃ dade ||

yuktau manasā saṃ suretasā
devebhyo havyaṃ kṛṇavāva sādhu |
yeṣāṃ bhāgas ta idaṃ juṣantām
avikṣubdhāv udayāva bhadrayā ||

yena devā jyotiṣā dyām udāyan
yenādityā vasavo yena rudrāḥ |
yenāṅgirasaḥ svar āruruhus
tenod ayāva yajamānau svasti ||

yaṃ papācāditiḥ putrakāmā
yena prajāḥ kaśyapaḥ paryagṛhnāt |
ya odanaḥ pacyate vaiśvadevaḥ
sa no yame akṣito bhāgo astu ||