Paippalāda-Saṃhitā · Chapter 19.37

abhi tvā śatapāśayā-
-atho sahasrapāśayā |
dāśo matsyam iva tīdena
mayi badhnāmi te manaḥ ||

ā hi te dakṣiṇaṃ padaṃ
hṛdayyaṃ dade |
upasthe padamopi
ni tvām akri sve vaśe ||

pari tvā gām ivāsaraṃ
mama patto nipattave |
tan mārutaṃ ha vairudham
āvataṃkaraṇaṃ kṛtam ||

ā nayāmi te mano
aśvam ivāśvābhidhānyā |
upa te muñce manaḥ
pador upānahau yathā ||

yathā surā yathā madhu
yathākṣā adhidevane |
yathā ha gavyato mana
evā mām abhi te manaḥ ||

evā kṛṇuṣva mā priyām
antaḥ kṛṇuṣva mā hṛdi |
yathā mannāpacetayā
nānyāsāṃ kīrtayāś cana ||

yasyedaṃ vaiṣṭapaṃ havir
bhagasya hastayor hitam |
tenā tvābhi mṛśāmasi
saubhāgyāya svastaye ||

bhaga memāṃ saṃ baṭ karo
mā paścān mā paro daghaḥ |
adhā bhagasya yo bhagas
tenemāṃ saṃ sṛjā bhaga ||

bhagena tvā saṃ sṛjāmi
māsureṇa surām iva |
yathāsasi priyā patyur
devṛbhyaḥ subhagāsasi ||

ud ito daivyaṃ vaca
iṣum iva tunnaḥ khide |
tenā sapatnān māmakān
sāsahāni jahāni ca ||

agnir mā pātu vasubhiḥ purastāt
savitādityair abhi pātu dakṣiṇāt |
indro marudbhir abhi pātu paścād
viśve devā abhi rakṣantu mottarāt ||

devarakṣasān mā pāhi
manuṣyarakṣasān mā pāhi |
viśvasmān mā rakṣasas pāhi ||

asau yas trikakud giriḥ
śṛṅgābhyām abhitiṣṭhati |
sa saṃpatatram udyugaṃ
balāsam iva tiṣṭhatu ||

divyaḥ suparṇa ā patad
ayodaṃṣṭro ayomukhaḥ |
sa saṃpatatram udyugam
ito yakṣmaṃ parā bhavat ||

sākaṃ balāsa pra pata
cāṣeṇa kikidīvyā |
sākaṃ vātasya dhrājyā
saha naśya nihākayā ||