પૈપ્પલાદ-સંહિતા · અધ્યાય 19.37

અભિ ત્વા શતપાશયા-
-અથો સહસ્રપાશયા ।
દાશો મત્સ્યમ્ ઇવ તીદેન
મયિ બધ્નામિ તે મનઃ ॥

આ હિ તે દક્ષિણં પદં
હૃદય્યં દદે ।
ઉપસ્થે પદમોપિ
નિ ત્વામ્ અક્રિ સ્વે વશે ॥

પરિ ત્વા ગામ્ ઇવાસરં
મમ પત્તો નિપત્તવે ।
તન્ મારુતં હ વૈરુધમ્
આવતંકરણં કૃતમ્ ॥

આ નયામિ તે મનો
અશ્વમ્ ઇવાશ્વાભિધાન્યા ।
ઉપ તે મુઞ્ચે મનઃ
પદોર્ ઉપાનહૌ યથા ॥

યથા સુરા યથા મધુ
યથાક્ષા અધિદેવને ।
યથા હ ગવ્યતો મન
એવા મામ્ અભિ તે મનઃ ॥

એવા કૃણુષ્વ મા પ્રિયામ્
અન્તઃ કૃણુષ્વ મા હૃદિ ।
યથા મન્નાપચેતયા
નાન્યાસાં કીર્તયાશ્ ચન ॥

યસ્યેદં વૈષ્ટપં હવિર્
ભગસ્ય હસ્તયોર્ હિતમ્ ।
તેના ત્વાભિ મૃશામસિ
સૌભાગ્યાય સ્વસ્તયે ॥

ભગ મેમાં સં બટ્ કરો
મા પશ્ચાન્ મા પરો દઘઃ ।
અધા ભગસ્ય યો ભગસ્
તેનેમાં સં સૃજા ભગ ॥

ભગેન ત્વા સં સૃજામિ
માસુરેણ સુરામ્ ઇવ ।
યથાસસિ પ્રિયા પત્યુર્
દેવૃભ્યઃ સુભગાસસિ ॥

ઉદ્ ઇતો દૈવ્યં વચ
ઇષુમ્ ઇવ તુન્નઃ ખિદે ।
તેના સપત્નાન્ મામકાન્
સાસહાનિ જહાનિ ચ ॥

અગ્નિર્ મા પાતુ વસુભિઃ પુરસ્તાત્
સવિતાદિત્યૈર્ અભિ પાતુ દક્ષિણાત્ ।
ઇન્દ્રો મરુદ્ભિર્ અભિ પાતુ પશ્ચાદ્
વિશ્વે દેવા અભિ રક્ષન્તુ મોત્તરાત્ ॥

દેવરક્ષસાન્ મા પાહિ
મનુષ્યરક્ષસાન્ મા પાહિ ।
વિશ્વસ્માન્ મા રક્ષસસ્ પાહિ ॥

અસૌ યસ્ ત્રિકકુદ્ ગિરિઃ
શૃઙ્ગાભ્યામ્ અભિતિષ્ઠતિ ।
સ સંપતત્રમ્ ઉદ્યુગં
બલાસમ્ ઇવ તિષ્ઠતુ ॥

દિવ્યઃ સુપર્ણ આ પતદ્
અયોદંષ્ટ્રો અયોમુખઃ ।
સ સંપતત્રમ્ ઉદ્યુગમ્
ઇતો યક્ષ્મં પરા ભવત્ ॥

સાકં બલાસ પ્ર પત
ચાષેણ કિકિદીવ્યા ।
સાકં વાતસ્ય ધ્રાજ્યા
સહ નશ્ય નિહાકયા ॥