Paippalāda-Saṃhitā · Chapter 19.36

dīrghajihvā bṛhadvāco
yābhir ārdrāṇi vāsāṃsi |
gāvo ghṛtasya mātaro
divi bheṣajam akrata ||

arjunīnām apacitāṃ
kṛṣṇā māteti susrava |
muner devasya mūlena
sarvāś chinadmi tā aham ||

chinadmy āsāṃ prathamāṃ
chinadmy uta madhyamām |
atho jaghanyām āsām
ā chinadmi stukām iva ||

apehi manasas pate
kim aśastāni śaṃsasi |
parehi na tvā kāmaye
vṛkṣān vanāni saṃ cara ||

avaśasā niḥśasā yat parāśasā-
-upārima yaj jāgrato yat svapantaḥ |
agnir viśvāny apa duṣkṛtāny
ajuṣṭāny āre asmad dadhātu ||

yad indra brahmaṇaspata
uta mṛṣā carāmasi |
pracetā na āṅgiraso
dviṣatas pātu tebhyaḥ ||

eha mām uttaraṃ kṛdhi
sahasva pṛtanāyataḥ |
vy asmat kṛtyā
vy asmac chapathām̐ aja ||

yo no dudhūrṣān manasā
yaś ca pāpena nobhyamāt |
ākūtiṃ tasya devā
hṛdaś cittāni vi ṣyata ||

aśva iva dhuri duryogaḥ
pratīhāya vahe daśa |
kṛtvānaṃ brahmaṇaspate
daṃṣṭrābhyām abhi saṃ jahi ||

yo 'nyā adhi prājāyathā
mūrdhno 'dhy ud avardhatāḥ |
tvaṃ sapatnacātano
bhrātṛvyām̐ ava dhūnuṣva ||

bahur ayaṃ saṃgaruṣṭo
nyakto bhūmyām adhi |
tenāham asya kartsyāmi
yathā sthāmā gamiṣyati ||

sthāmāgan bṛhad akṣatraḥ
sthāmantākṣṇiṇo 'va syati |
antaṣṭhānasya yo rājā
sa utthāma gamiṣyati ||

agamad rājā sadanam
agamat sūryo divam |
udayan vṛtrahan plīhā
aṅgarājo avīrahā ||

yathā panthāṃ kavāpatho
apyeti mahāpatham |
evā tvaṃ plīhan naḥ plīhi
yato 'sy abhyāgataḥ ||

indreṇa dattaṃ balam āsurābhyāṃ
śitaṅgaitac chālvatāyai ca tubhyam |
tau nudethāṃ kaṇvā aśivā ajuṣṭā
adhā gṛhāṇāṃ gṛhapā tvam eṣām ||

tvam agne gṛhapatir gṛhāṇāṃ
tvaṃ prajānāṃ janitāsi dātā |
tvaṃ nudasva kaṇvā aśivā ajuṣṭā
sadānvā nirataḥ seda pāpīḥ ||

carmābhyaḥ krūram ānahya
hariṇasya bhiyaṃ kṛdhi |
mṛgām̐ anu pra pātaya
marīcīr anu nāśaya ||

yady asy apsarāvīr
yadi tvā rakṣo agrabhīt |
tasmā apaplavaṃ havir
manasā juhomi te ||