Paippalāda-Saṃhitā · Chapter 19.34

tvacāpidhāne subhage
datparistaraṇe kave |
ekām iva vraje gāṃ
pari tvā varcasāsicam ||

agreṇīr iva haṃsānāṃ
prapaśyantī puras patham |
jihve mā vivyatho mā
yathāpūrvaṃ tvaṃ vada ||

varcasvad aham udyāsaṃ
brahmarājanyābhyāṃ
śudrāya cāryāya ca |
yasmai ca kāmayāmahe
sarvasmai ca vipaśyate ||

arvāñcau pādau pra hara-
-arvācīnaṃ manas tava |
arvācīnasya te ataḥ
parāṅ manyuṃ ni vartatām ||

chāgalāde bhagavo
'rvāg jyote parastamaḥ |
ā tvā khalajñakād asmāt
punar ā vartayāmasi ||

yathā vrīhīn vrīhikhale
samākurvanti tūlibhiḥ |
evā te viṣṭhitaṃ manaḥ
sam ā karomi mām abhi ||

tvam uttamaṃ surabhiṣāṃ
mādhyamaṃ vahator asi |
tvayā vadhūr vi jaṅgahe
taṃ tvā varcasa ā dade ||

mūrdhnas te mūrdhanyebhyo
'gruvaḥ pativittyāḥ |
aukṣaṃ śīrṣata ā dade ||

yaś ca svādmā te aṅgeṣu
yaḥ premā hṛdaye ca te |
taṃ tvad ā veśayāmahe
mayi bhrājāti dīdyat ||

vātaraṃhā vājin bhava yujyamāna
indrasya yāhi prasave manojavāḥ |
yuñjantu tvā maruto daivyāsa
ā te tvaṣṭā patsu javaṃ dadhātu ||

javas te arvan nihito guhā
yaḥ śyene carati yaś ca vāte |
tena tvaṃ vājin balavān balena-
-ājiñ jaya samane pārayiṣṇuḥ ||

āsīyāne 'dhi manasa
āsīyāne 'dhi cakṣuṣaḥ |
āsīyānasya vātād bhūtvā-
-ājiñ jaya samane pārayiṣṇuḥ ||

tanūs te vājin tanvaṃ vahantī
vāmam asmabhyaṃ dhātu śarma tubhyam |
ahruto maho dharuṇāya devā
divyam iva jyotiḥ svar ānamīyāḥ ||

indro mā vakṣad akṣataṃ
vṛtrahā yo vṛtañjayaḥ |
sa me rathaṃ sa sārathiṃ
so aśvān sādhu me nayāt ||

indro mā tena nayatu
panthā yo abhayaḥ sugaḥ |
dakṣiṇā pārayāti mā
mā riṣaṃ samare yudhām ||

hṛtsuke pari ṇo nama
pārigaṃ tanve kṛdhi |
yuyuta parṇinaṃ śaram
utāparṇaṃ riśād iti ||