Paippalāda-Saṃhitā · Chapter 19.32

bhagena mā śāṃśapena
sākam indreṇa medinā |
kṛṇomi bhaginaṃ mā-
-apa drāntv arātayaḥ ||

yo andho yaḥ punaḥsaro
bhago vṛkṣeṣv ārpitaḥ |
bhago me astu śāṃśapo
'pa drāntv arātayaḥ ||

yathā vṛkṣām̐ abhyabhavaḥ
sākam indreṇa medinā |
evā mā bhaginaṃ kṛṇv
apa drāntv arātayaḥ ||

apeto nīlalohitaṃ
jātaṃ himavatas pari |
kīśmīlam urvarābhyo
divo jātam anīnaśam ||

abhrāj jātaṃ varṣāj jātam
atho jātaṃ divas pari |
atho samudrād jātaṃ
kīśmīlaṃ nāśayāmasi ||

yo nīhārād yaḥ pruṣvā
yo adbhyas pari jāyase |
garbho yo vidyutām asi
sa naḥ kīśmīla mṛḍaya ||

nodeyīḥ sikatā imāḥ
sindhutas paryābhṛtāḥ |
tābhir yamasya kīśmīlaṃ
saṃbhṛtābhir anīnaśam ||

tvayā pūrvaṃ vibhīdaka
saṃjitā asurā hatāḥ |
tvaṃ sapatnacātano
bhrātṛvyām̐ ava dhūnuṣva ||

vi bhinattu vibhīdakas
tīkṣṇaśṛṅga iva ṛṣabhaḥ |
atho sapatnān ā dattām
atho hantu durasyataḥ ||

vyavadhīt sahamānaḥ sapatnān
dviṣato me 'dharām̐ akaḥ |
abhy abhūd bhūtyobhayām ||

ya āskandaḥ parāskanda
ākhuḥ kakubha āt krimiḥ |
upajīkām̐ upakvasān
tān sarvān jambhayāmasi ||

api nahyāmy ākhor
muñjena mukham āsyam |
anadaṃ yathā carād
apaitum urvarābhyaḥ ||

apinahyamukha ākhuḥ
paroktaḥ prāṭparāṇutaḥ |
śṛṇāmy asya dantān
nir akṣau pādayāmasi ||

aśvinā sāraghena mā
madhunāṅkta śubhaspatī |
yathā varcasvatīṃ vācam
āvadāni janām̐ anu ||

yaśā ahaṃ nimiṣate
pratikhyātre yaśā aham |
atraimi tad yaśā aham
uta tatra yaśā aham ||

asmai ca sarvasmai bhūtāya
sarvasmai ca vipaśyate |
sarvasmā id ahaṃ yaśāḥ ||

apottudāporṇuhi
yadīdam asti vā na vā |
vyandhyaṃ vyalguṇaṃ cakṣur
akṣībhyāṃ kṛdhi ||

aṅgaṃ hiraṇyayaṃ kṛtvā
laṅgalāṣam armaṃ ca |
tad devā apa lumpata ||

cakṣuṣman me mano astu
cakṣuṣmad dhṛdayaṃ mama |
cakṣuṣmac cittam astu me
cakṣuś cakṣuṣmad astu me
cakṣur ā dhehi me 'kṣyoḥ ||