Paippalāda-Saṃhitā · Chapter 19.31

atīmām akhyaṃ pṛthivīm
ati dyām ati sūryam |
ati viśvam idaṃ bhūtam
aty akhyaṃ yātudhānyaḥ ||

darśaya mā yātudhānān
darśaya yātudhānyaḥ |
aghāyūn sarvān darśaya-
-iti tvauṣadha ā rabhe ||

evā sahasracakṣo tvaṃ
prati paśyāsy āyataḥ |
saho 'si yātudhānajambhanam ||

imāḥ pāre pṛdākvas
triṣaptā nirjarāyavaḥ |
tāsāṃ jarāyuṇā vayam
akṣyāv api vyayāmasy
aghāyoḥ paripanthinaḥ ||

viṣūcy etu kṛntatī
pinākam iva bibhratī |
viṣvak punarbhuvā mano
'samṛddhā aghāyavaḥ ||

apetaḥ paripanthino
+'po aghāyur arṣatu |
na bahavaḥ saṃ śaknavan
nārbhakā abhi dhṛṣṇavan ||

pretaṃ pādau pra sphurataṃ
vahataṃ pṛṇato gṛham |
indrāṇy etu prathamā-
-ajītāmuṣitā pathā ||

āyam agan phālgumaṇir
balena baladāḥ saha |
yenendro dasyūnāṃ vīrām̐
asurāṇām avātirat ||

varcasā māṃ payasokṣantu devā
varcasā dyāvāpṛthivī ubhe |
varco me devaḥ savitā dadhātu
varco vipraḥ kaśyapo me dadhātu ||

varco ma āpo dadhatu
varco me vīrudho dadhan |
bhūtāni sarvāḥ saṅgatya
varca ā dhur mukhe mama ||

yāḥ purastād vitiṣṭhante
gāvaḥ pravrājinīr iva |
vātīkṛtasya bheṣajīḥ
pippalīḥ pārayiṣṇavaḥ ||

rudrasya mūtram asy
amṛtasya nābhiḥ |
pṛthivyāṃ mūlaṃ niṣṭhitam asi
viṣāṇā nāma vātīkṛtabheṣajī ||

śaṃ te astu matasnābhyāṃ
śaṃ yakne śaṃ talīdyai |
śaṃ te pṛṣṭibhyo majjabhyaḥ
śam astu tanve tava ||

na hi te agne tanvaḥ
krūram ānaṃśa martyam |
kapir babhastu tejanaṃ
svaṃ jarāyu gaur iva ||

tveṣa iva saṃ ca vi ca roruvaṇyate
yad uttaradrā uparasya khādati |
śīrṣṇā śiro apsasāpso ardayann
aṃśūn babhastu haritebhir āśubhiḥ ||

suparṇā vācam akratopa dyavy
ākhare kṛṣṇā iṣirā anartiṣuḥ |
ni yan niyanty uparasya niṣkṛtiṃ
purū reto dadhire sūryasyutaḥ ||