પૈપ્પલાદ-સંહિતા · અધ્યાય 19.31

અતીમામ્ અખ્યં પૃથિવીમ્
અતિ દ્યામ્ અતિ સૂર્યમ્ ।
અતિ વિશ્વમ્ ઇદં ભૂતમ્
અત્ય્ અખ્યં યાતુધાન્યઃ ॥

દર્શય મા યાતુધાનાન્
દર્શય યાતુધાન્યઃ ।
અઘાયૂન્ સર્વાન્ દર્શય-
-ઇતિ ત્વૌષધ આ રભે ॥

એવા સહસ્રચક્ષો ત્વં
પ્રતિ પશ્યાસ્ય્ આયતઃ ।
સહો ઽસિ યાતુધાનજમ્ભનમ્ ॥

ઇમાઃ પારે પૃદાક્વસ્
ત્રિષપ્તા નિર્જરાયવઃ ।
તાસાં જરાયુણા વયમ્
અક્ષ્યાવ્ અપિ વ્યયામસ્ય્
અઘાયોઃ પરિપન્થિનઃ ॥

વિષૂચ્ય્ એતુ કૃન્તતી
પિનાકમ્ ઇવ બિભ્રતી ।
વિષ્વક્ પુનર્ભુવા મનો
ઽસમૃદ્ધા અઘાયવઃ ॥

અપેતઃ પરિપન્થિનો
+ઽપો અઘાયુર્ અર્ષતુ ।
ન બહવઃ સં શક્નવન્
નાર્ભકા અભિ ધૃષ્ણવન્ ॥

પ્રેતં પાદૌ પ્ર સ્ફુરતં
વહતં પૃણતો ગૃહમ્ ।
ઇન્દ્રાણ્ય્ એતુ પ્રથમા-
-અજીતામુષિતા પથા ॥

આયમ્ અગન્ ફાલ્ગુમણિર્
બલેન બલદાઃ સહ ।
યેનેન્દ્રો દસ્યૂનાં વીરાઁ
અસુરાણામ્ અવાતિરત્ ॥

વર્ચસા માં પયસોક્ષન્તુ દેવા
વર્ચસા દ્યાવાપૃથિવી ઉભે ।
વર્ચો મે દેવઃ સવિતા દધાતુ
વર્ચો વિપ્રઃ કશ્યપો મે દધાતુ ॥

વર્ચો મ આપો દધતુ
વર્ચો મે વીરુધો દધન્ ।
ભૂતાનિ સર્વાઃ સઙ્ગત્ય
વર્ચ આ ધુર્ મુખે મમ ॥

યાઃ પુરસ્તાદ્ વિતિષ્ઠન્તે
ગાવઃ પ્રવ્રાજિનીર્ ઇવ ।
વાતીકૃતસ્ય ભેષજીઃ
પિપ્પલીઃ પારયિષ્ણવઃ ॥

રુદ્રસ્ય મૂત્રમ્ અસ્ય્
અમૃતસ્ય નાભિઃ ।
પૃથિવ્યાં મૂલં નિષ્ઠિતમ્ અસિ
વિષાણા નામ વાતીકૃતભેષજી ॥

શં તે અસ્તુ મતસ્નાભ્યાં
શં યક્ને શં તલીદ્યૈ ।
શં તે પૃષ્ટિભ્યો મજ્જભ્યઃ
શમ્ અસ્તુ તન્વે તવ ॥

ન હિ તે અગ્ને તન્વઃ
ક્રૂરમ્ આનંશ મર્ત્યમ્ ।
કપિર્ બભસ્તુ તેજનં
સ્વં જરાયુ ગૌર્ ઇવ ॥

ત્વેષ ઇવ સં ચ વિ ચ રોરુવણ્યતે
યદ્ ઉત્તરદ્રા ઉપરસ્ય ખાદતિ ।
શીર્ષ્ણા શિરો અપ્સસાપ્સો અર્દયન્ન્
અંશૂન્ બભસ્તુ હરિતેભિર્ આશુભિઃ ॥

સુપર્ણા વાચમ્ અક્રતોપ દ્યવ્ય્
આખરે કૃષ્ણા ઇષિરા અનર્તિષુઃ ।
નિ યન્ નિયન્ત્ય્ ઉપરસ્ય નિષ્કૃતિં
પુરૂ રેતો દધિરે સૂર્યસ્યુતઃ ॥