Paippalāda-Saṃhitā · Chapter 19.30

yat tvā māṃse apavavau
yan manthe yad odane |
agniṣ ṭvā viśvabheṣajas
tasmāt pātv aṃhasaḥ ||

yas tvā vāta āvāty
adharād uttarād uta |
āpo yā viśvaśaṃbhuvas
tās tvā pātv aṃhasaḥ ||

apa tvan mṛtyuṃ nirṛtim
apa yakṣmaṃ ni dadhmasi |
yathā tvam arapā asa
udojā uttaro bhuvaḥ ||

vaiśvānaro raśmibhir naḥ punātu
vātaḥ prāṇeneṣiro nabhobhiḥ |
dyāvāpṛthivī payasā payasvatī
ṛtāvarī yajñiye mā punītām ||

prajāpatir ṛtubhiḥ pañcabhiḥ
saṃvatsaro dhāmabhiḥ pātu viśvaiḥ |
ihaiva prāṇaḥ sakhye no astu
tam ātmani punar ā veśayāmi ||

vaiśvadevīṃ sūnṛtām ā rabhadhvaṃ
śuddhā bhavantaḥ śucayaḥ pāvakāḥ |
tayā gṛṇantaḥ sadhamādeṣu
vayaṃ syāma patayo rayīṇām ||

vaiśvānarīṃ varcasa ā rabhadhvaṃ
yasyā āśās tanvo vītapṛṣṭhāḥ |
īḍayeha sadhamādaṃ madanto
jyok paśyema sūryam uccarantam ||

avatkaṃ mama bheṣajam
avatkaṃ parivācanam |
narācy asi mā tudo
vanvānā rogabheṣajam ||

śambhuleham ihā hara
tam u kṣīrā ud asyati |
tad āsrāvasya bheṣajaṃ
tad u rogam anīnaśat ||

nadīṣu naḍvalāsu
kumbheṣu kalaśeṣu ca
pratīṣecanabheṣajam |
tat te kṛṇomi bheṣajam
addhi māṃsaṃ pibodakaṃ
paṭpaṭiṅgaṃ vipaścalaṃ vi paśya ||

avidāma yad aicchāma
piśācakṣayaṇaṃ haviḥ |
tena kravyādo hanmaḥ
sarvāś ca yātudhānyāḥ ||

icchanti tvā padātaya
icchanti rathinas tvā |
krīṇanti gobhir aśvair
amṛtasyeva vā asi ||

amamri nāma bheṣajaṃ
pṛthivyā adhy udbhṛtam |
vaktā tan mahyam abravīd
idaṃ ha pārayād iti ||

cakṣur asi puruṣasya
cakṣur goś cakṣur arvataḥ |
cakṣur bhūtasya bhavyasya
cakṣur apsarasām asi ||

cakṣur asi suparṇasya
cakṣur aher atho śunaḥ |
cakṣuḥ sarvasya paśyato
'tho yad viśvam ejati ||

ādadānaṃ sahasrākṣaṃ
pratispāśanam abruvam |
darśaya mā yātudhānān
darśaya yātudhānyāḥ ||