Paippalāda-Saṃhitā · Chapter 19.29

agnī rakṣohā tigmas tigmaśṛṅgo
hantu rakṣo nudatām arātim |
apāghaśaṃsam asyatu ||

ā ta etu parāvato
balam ojo divas pari |
ā giribhyaḥ parvatebhya
āyuṣ ṭe viśvato dadhat ||

punas te 'suṃ pṛthivī dadātu
punar dyaur devo punar antarikṣam |
punas te somas tanvaṃ dadhātu
punaḥ pūṣā pathyāṃ yā svastiḥ ||

kaṣkiṣā kaṣpiṣā
yevāṣā eṣā |
iṣṭargava iṣayantaḥ
saikatāḥ pāṃsavāḥ ||

adṛṣṭān na dṛṣṭān |
dṛṣṭām̐ adṛṣṭān dhanapate
jahīndrasya vadhena ||

etāś ca viśvarūpāś ca
gṛdhrāḥ kokāś ca te hatāḥ ||

kāme kāmayasva mā
pratīcī prati mā bhava |
mām anu pra te mano
vatsā pākeva dhāvatu ||

abhīle abhimādany
asau mām abhi mādyatu |
vidma patatriṇyā vayam
iṣuke nāmakaṃ tava ||

ahaṃ te mana ā dade
mano manomuṣir yathā |
mayi te mana āhitaṃ
ratha iva rathavāhane ||

ud asau sūryo agān
mahyam avatunā saha |
ahaṃ viśāṃ purohito
madhuhasto madhujihvo
mayi vāg astu dharṇasī ||

ahaṃ viśyena ketunā
samakṣye mānuṣeṣv ā |
asmākam astu kevalaṃ bṛhad
diśo adhi viśveṣu rājasu ||

svādoś cin mā svādīyāṃsaṃ
madhoś cin madhumattaram |
priyāś cit sakhyur antaram
ādityāsaḥ kṛṇota mā ||

agne brahma tvaṃ brahmāsi
viddhi tvaṃ prāsmabhyaṃ brūhi |
yadīdaṃ tathā bhaviṣyasi yadi vā
nāthaitasya haviṣo vīha svāhā ||

vi pṛcche dyāvāpṛthivī
vīndraṃ vi bṛhaspatim |
vi devān yajñiyān pṛcche
vy asaṃ jīvanāya kam ||

vijñānāyodyatā prastutā srug iyaṃ
yama rājan havir idaṃ juṣasva |
agatāsor haviṣo mādayasva
nirṛtiṃ gacchatu yad gatāsoḥ ||