Paippalāda-Saṃhitā · Chapter 19.28

yasyedam ā rajo yujas
tuje janaṃ vanaṃ svaḥ |
indrasya nādhṛṣe śavaḥ ||

dhṛṣāṇaṃ dhṛṣataḥ śavaḥ
purā yathāyatiṣṭhan |
indrasya rantyaṃ mahat ||

sa no dadhātu taṃ rayiṃ
puruṃ piśaṅgapeśasam |
indraḥ patis tuviṣṭamo janeṣv ā ||

āyur agna ihā vaha
jātavedas tanūvaśin |
yathāhaṃ jyog ihāsāni
prajānām adhipā vaśī ||

āyur indro dadhātu ma
āyur devo bṛhaspatiḥ |
āyur me viśve devā
ahorātre ca cakratuḥ ||

āyur āyuṣyā pavatāṃ
prāṇaṃ prāṇo dadhātu me |
devā yac cakrur devebhyaḥ
svar yanto yathāyatham ||

utpatantu nabhasvatīḥ
samudrād adhi ghoṣiṇīḥ |
utsyāḥ samudriyā apas
tābhiṣ ṭvā tarpayāmasi ||

yā āpo divyā
yā vātāt parijajñire |
indro marutvāṃs tṛptātmā
tābhiṣ ṭvā tarpayāmasi ||

yāḥ śuṣkā yā hariṇīr
yā bhūmim anuvāvṛdhuḥ |
sarvāḥ samagrā oṣadhīs
tābhiṣ ṭvā tarpayāmasi ||

ā no medhā sumatir viśvarūpā
giro bṛhatīr āveśayantī |
ṛco me bahvīr ny anaktu gā iva
yathāsāma bhuvaneṣu karṇinaḥ ||

dīkṣā tapo manaso mātariśvā
bṛhaspatir vāco asyāḥ sa yoniḥ |
vedāṃsi vidyā mayi santu bahvīr
agnīṣomā yaśo asmāsu dhattam ||

yad agne tapasā tapa
upaprekṣāmahe vayam |
priyāḥ śrutasya bhūyāsma-
-āyuṣmantaḥ sumedhasaḥ ||

yas tvā mātur uta vā pituḥ
parijāyamānam abhisaṃbabhūva |
taṃ tvad yakṣmam adhi nāśayāmaḥ
so 'nyasmiṃ chrayātai praviṣṭaḥ ||

yas te yakṣmo hṛdayeṣṭho
nābhiṣṭhā udaraṃgamaḥ |
atho yaḥ śiśriye parau
taṃ tvad yakṣmam adhi nāśayāmaḥ
so 'nyasmiṃ chrayātai praviṣṭaḥ ||

śīrṣarogam aṅgarogaṃ
snāvabṛham abhiśāciṃ visalpakam |
yas te yakṣmo majjasu paruḥsu yo gudāsu
taṃ tvad yakṣmam adhi nāśayāmaḥ
so 'nyasmiṃ chrayātai praviṣṭaḥ ||