પૈપ્પલાદ-સંહિતા · અધ્યાય 19.27

યત્ કિં ચાસૌ મનસા યચ્ ચ વાચા
યજ્ઞૈર્ જુહોતિ હવિષા યજુર્ભિઃ ।
તન્ મૃત્યુના નિરૃતિઃ સંવિદાના
પુરા દૃષ્ટાદ્ આજ્યં હન્ત્વ્ અસ્ય ॥

યાતુધાના નિરૃતિર્ આદ્ ઉ રક્ષસ્
તે અસ્ય ઘ્નન્ત્વ્ અનૃતેન સત્યમ્ ।
ઇન્દ્રેષિતા આજ્યમ્ અસ્ય મથ્નન્તુ
મા તત્ સં પાદિ યદ્ અસૌ જુહોતિ ॥

પરિ ત્વાગ્ને પુરં વયં
વિપ્રં સહસ્ય ધીમહિ ।
ધૃષદ્વર્ણ દિવેદિવે
હન્તારં ભઙ્ગુરાવતામ્ ॥

સ્વર્જિદ્ અધિરાજૌ
શ્યેનૌ સંપાતિનાવ્ ઇવ ।
આજ્યં પૃતન્યતો હતં
યો અસ્માન્ પૃતનાયતિ ॥

પૃથિવ્યૈ વનસ્પતિભ્ય ઓષધીભ્યો
ઽગ્નયે ઽધિપતયે સ્વાહા ॥

અન્તરિક્ષાય પ્રાણાય વયોભ્યો
વાયવે ઽધિપતયે સ્વાહા ॥

દિવે ચક્ષુષે નક્ષત્રેભ્યઃ
સૂર્યાયાધિપતયે સ્વાહા ॥

પિપ્પલ્યઃ સમ્ અવદન્ત-
-આયતીર્ જનનાદ્ અધિ ।
યં જીવમ્ અશ્નવામહૈ
ન સ રિષ્યાતિ પૂરુષઃ ॥

પિપ્પલી ક્ષિપ્તભેષજ્ય્
ઉતાવવિદ્ધભેષજી ।
તાં દેવાઃ સમ્ અકલ્પયન્ન્
અલં જીવાતવા ઇતિ ॥

અસુરાસ્ ત્વા ન્ય્ અખનન્
દેવાસ્ ત્વોદ્ અવપન્ પુનઃ ।
વાતીકૃતસ્ય ભેષજી
પિપ્પલી ક્ષિપ્તભેષજી ॥

યદ્ ઉલૂકો વદતિ મોઘમ્ એતદ્
યત્ કપોતઃ પદમ્ અગ્નૌ કૃણોતિ ।
યસ્ય દૂતૌ પ્રહિતાવ્ ઇદમ્ એયથુસ્
તસ્મૈ યમાય નમો ઽસ્તુ મૃત્યવે ॥

યસ્ તે દૂતો નિરૃત આજગામ-
-અપ્રહિતઃ પ્રહિતો વા ગૃહં નઃ ।
કપોતોલૂકાવ્ અપદં તદ્ અસ્ત્વ્
અવૈરહત્યમ્ ઇદમ્ આ જગન્થ
સુવીરતાયા ઇદમ્ આ સસત્થ ॥

યઃ પ્રથમઃ પ્રવત આસસાદ
બહુભ્યઃ પન્થામ્ અનુપસ્પશાનઃ ।
ય ઈશે અસ્ય દ્વિપદો યશ્ ચતુષ્પદસ્
તસ્મૈ યમાય નમો ઽસ્તુ મૃત્યવે ॥

યથાસિતઃ પ્રથયતે વશાઁ અનુ
વપૂંષિ કૃણ્વન્ન્ અસુરસ્ય માયયા ।
એવા મે શેપઃ સહસાયમ્ અર્ક
એનાઙ્ગેન સંસમકં કૃણોતુ ॥

યાવદ્ અઙ્ગીનં પારસ્વતં
હાસ્તિનં ગાર્દભં ચ યત્ ।
યાવદ્ અશ્વસ્ય વાજિનસ્
તાવન્ મે વર્ધતાં પસઃ ॥

યથા પસસ્ તાયાદરં
વાતેન સ્થૂલભં કૃતમ્ ।
યાવત્ પરસ્વતઃ પસસ્
તાવન્ મે વર્ધતાં પસઃ ॥