Paippalāda-Saṃhitā · Chapter 19.24

na taṃ yakṣmā arundhate
nainaṃ śapatho aśnute |
yaṃ bheṣajasya gulguloḥ
surabhir gandho aśnute ||

yaṃ gulgulor bheṣajasya
surabhir gandho aśnute |
viṣvañcas tasmād yakṣmā
mṛgā iṣvā iverate ||

yad gulgulu saindhavaṃ
yad vā ghāsi samudriyam |
ubhayor agrabhaṃ nāma-
-asmā ariṣṭatātaye ||

devā etaṃ madhunā saṃyutaṃ yavaṃ
sarasvatyām adhi maṇāv acarkṛṣuḥ |
indra āsīt sīrapatiḥ śatakratuḥ
kīnāśā āsan marutaḥ sudānavaḥ ||

bṛhatpalāśe subhaga
ūrdhvasvapna ṛtāvari |
māteva putrebhyo mṛḍa
keśebhyo naḥ śami ||

yas te mado +'vakeśo yo vikeśo
yenābhihasyaṃ puruṣaṃ kṛṇoṣi |
bhrūṇaghnovirivārā (c) cara tvaṃ
tasya te prajāyāḥ suvāmi keśān ||

ākūtiṃ devīṃ subhagāṃ puro dadhe
cittasya mātā suhavā no astu |
yām āśām emi kevalī sā me astu
videyam enāṃ manasi praviṣṭām ||

ākūtyā no bṛhaspata
ākūtyā na upā gahi |
atho bhagasya no dhehy
atho naḥ suhavo bhava ||

bṛhaspatir ma ākūtim āṅgirasaḥ
prati jānātu vācam etām |
yasya devā devatāḥ sambabhūvuḥ
suṣupraṇīḥ kāmo anv etv asmān ||

mano nv āhvāmahi
nārāśaṃsena stomena |
pitṝṇāṃ ca manmabhiḥ ||

ā na etu manaḥ punaḥ
kratve dakṣāya jīvase |
jyok ca sūryāya dṛśe ||

punar naḥ pitaro mano
dadātu daivyo janaḥ |
jīvaṃ vrātaṃ sacemahi ||

vayaṃ soma vrate tava
manas tanūṣu bibhrataḥ |
prajāvantaḥ sacemahi ||

varco me mitrāvaruṇā
varco devī sarasvatī |
varco me aśvinobhā
dhattaṃ puṣkarasrajā ||

yac ca varco yajamāne
yac ca yajñe 'dhy āhitam |
surāyāṃ babhru yad varcas
tasya bhakṣīya varcasaḥ ||

yā utsebhyaḥ prasravanti
divo dhārā nadībhyaḥ |
tāsāṃ tvā sarvāsām apām
abhi ṣiñcāmi varcasā ||

yad rājānaṃ śakadhūmaṃ
nakṣatrāṇy akṛṇvata |
bhadrāham asmai prāyacchan
tato rāṣṭram ajāyata ||

bhadrāham astu naḥ sāyaṃ
bhadrāhaṃ prātar astu naḥ |
bhadrāham asmabhyaṃ tvaṃ
śakadhūma sadā kṛṇu ||

yo no bhadrāham akaraḥ
sāyaṃ prātar atho divā |
tasmai te nakṣatrarāja
śakadhūma sadā namaḥ ||

yad āhuḥ śakadhūmāhaṃ nakṣatrāṇāṃ
prathamajaṃ jyotir agre |
tan naḥ saniṃ madhumatīṃ kṛṇotu
rayiṃ ca naḥ sarvavīraṃ ni yacchāt ||