Paippalāda-Saṃhitā · Chapter 19.23

sāhasī nāma vā asi
sahasas pari jajñiṣe |
sahasvān indro deveṣu
sahase tvā khanāmasi ||

sahasyena bheṣajena
divyena śataparvaṇā |
tena sahasrakāṇḍena
kṛṇomi punarābhṛtim ||

sahaso 'haṃ bheṣajasya
divyasya nāma jagrabha |
vy āśiṣaiva tasthire
yakṣmāsaḥ puruṣād adhi ||

apeta etu nirṛtir
nehāsyā api kiṃ cana |
apāsyāḥ satvanaḥ pāśān
mṛtyūn ekaśataṃ nude ||

ye te pāśā ekaśataṃ
mṛtyo martyāya hantave |
tāṃs te yajñasya māyayā
sarvām̐ apa yajāmasi ||

nir ito yantu nairṛtā
mṛtyava ekaśataṃ paraḥ |
sedhāma eṣāṃ yat tamaḥ
prāṇaṃ jyotiś ca dadhmahe ||

triṣaptā vāraṇā imās
tābhir mām indro abravīt |
viṣaṃ vārayatām iti
viṣaṃ dūṣayatād iti ||

apa brūtedaṃ maruto
mahīndrasyāpavācanī |
eṣā sahasram arhaty
eṣā vārayate viṣam ||

asthād dyaur asthāt pṛthivy
asthād viśvam idaṃ jagat |
asthur viṣasyābhītayaḥ
pratikūla ivābalaḥ ||

yathā bāṇaḥ susaṃśitaḥ
parāpataty āśumat |
evā kāśe parā pata
sākaṃ vātasya dhrājyā ||

yathā cakṣuś cakṣuṣmataḥ
parāpatati ketumat |
(…)
sākaṃ sūryasya raśmibhiḥ ||

yathā mano manyuketuṃ
parāpatati yojanā |
evā kāśe parā patat
samudrasyānu vikṣaram ||

ita evāva gacchata-
-ugrā bhavata mābalāḥ |
hvayantu sarve vo devāḥ
sarvā vo vṛṇatāṃ viśaḥ ||

yad avagamena haviṣā-
-ava vo gamayāmasi |
atrāta indraḥ kevalīr
viśo balihṛtaḥ karat ||

indraḥ kaśyapa ād agnir
iḍā turīyā vaḥ sakhā |
yad bhūtaṃ bhavyam āsanvat
tenāva gamayāmi vaḥ ||