Paippalāda-Saṃhitā · Chapter 19.21

yathā sūryo nakṣatrāṇāṃ
varcāṃsi yuvate divaḥ |
evā sapatnānām ahaṃ
varca indriyam ā dade ||

yac ca varcaḥ sapatnānāṃ
bhrātṛvyeṣu ca yad yaśaḥ |
tad indro vṛtrahā dhātā
savitā dīdharan mayi ||

yāś ca gāvaḥ sapatnānāṃ
bhrātṛvyeṣu ca yad vasu |
tan nir jyeyam iva jītvā
savitā dīdharan mayi ||

satyam eva jayatu nānṛtaṃ
satyasya panthā ṛjur astu sādhuḥ |
satyaṃ vadantaḥ samidhe vidhema
satyena dyāvāpṛthivī aprathetām ||

vāgbhāgasya ca satyena
rudrasya sumanasyayā |
indreṇādhibruvatā vayaṃ
viśaṃ prāśi videmahi ||

yā te rudreṣur āyatā
vāci vā te araṃkṛtā |
yenedaṃ vivadāmahe
tasya prāśaṃ tvaṃ jahi ||

jahi tvaṃ tasya prāśam
uta satyām utānṛtām |
yo asmān indra vṛtrahan
vācā prāśaṃ jigīṣati ||

ut pramut prāṇa
bahvīha sīdedaṃ pṛṇa |
utodiva sma siñcatāt
samudrasyeva madhyataḥ ||

samudraś ca śatadhāraḥ
sahasradhāro akṣitaḥ |
purastād indra ācarat
pūrṇagoṣṭha idaṃ pṛṇa ||

ihopa pṛṇa saṃ pṛṇa
vṛṣa prajananāḥ kṛdhi |
iha gāvaḥ pra jāyadhvam
ihāśvā iha pūruṣāḥ |
iho sahasradakṣiṇo
abhi prāśā ni ṣīdatu ||

jyeṣṭhaghnyai nakṣatrāṇām
ahne rātryā idaṃ namaḥ |
juhomi viśvakarmaṇe
sa śivo mṛḍayāti naḥ ||

mā jyeṣṭhaṃ vadhīd ayam agna eṣāṃ
mūlabarhaṇaṃ pari vṛṇakty enam |
grāhyāḥ pāśān vi cṛta prajānan
pitāputrau mātaraṃ muñca sarvān ||

un muñca pāśāṃs tvam agna eṣāṃ
trayas tribhir utthitā yebhir āsan |
māyaṃ hiṃsīḥ pitaraṃ vardhamāno
mā mātaraṃ pra minīr yā janitrī ||

grāhyāḥ pāśān vi cṛta ye sinanti
yāṃ brahmaṇā parivṛñjanti vedhasaḥ |
un muñca pāśāṃs tvam agna eṣāṃ
tvajjātasyānv ahar-ahar astu bhadram ||

ni vartadhvaṃ mānu gāta-
-asmān siṣakta revatīḥ |
agnīṣomā punarvasū
asya vardhayataṃ rayim ||

punar enā ni vartaya
punar enā upā kuru |
indra enā ni yacchatv
agnir enā upājatu ||

pari vo viśvato dadha
ūrjā ghṛtena payasā |
ye devāḥ ke ca yajñiyās
te rayyā saṃ sṛjantu mā ||