પૈપ્પલાદ-સંહિતા · અધ્યાય 19.20

જ્યેષ્ઠઘ્ન્યાં જાતો વિચૃતોર્ યમસ્ય
માયં હિંસીઃ પિતરૌ વર્ધમાનઃ ।
સ્યોનૌ વ્યાઘ્રા ઉત તે શિવૌ સ્તામ્
અતિ નેષં દુરિતાનિ વિશ્વા ॥

વ્યાઘ્રે અહ્ન્ય્ અજનિષ્ટ વીરો
નક્ષત્રજાઃ સર્વવીરઃ સુવીરઃ ।
સ મા હિંસીઃ પિતરૌ વર્ધમાનસ્ તસ્ય
તે દેવાઃ પ્રતિ ગૃહ્ણન્તુ હોમમ્ ॥

યા રોહિણીર્ દેવપત્યા
પ્ર ધેનુર્ ઇવ પિન્વતે ।
તત્ર તિસ્રો વ્યષ્ટકાઃ સર્વાઁ અધિ
બ્રુવન્તુ પ્રજાયૈ જગતે ચ વામ્ ॥

યદ્ આર્દ્રાભ્યામ્ અરણિભ્યાં દેવાઃ
શક્રા અમન્થં પુરુષેણ પુરુષમ્ ।
અત્રાપુષ્યતં મિથુના સયોની
જીવાં પ્રજાં જરદષ્ટિં સુતેજસા ॥

હતં પતઙ્ગમ્ ઉત તર્દમ્ આખુમ્ અશ્વિના
ભિન્તં શિરો મૃણતં હનૂ દતઃ ।
યથા નઃ સસ્યં ન ઘસં વ્યદ્વરા
એવાભયં કૃણુતં ધાન્યાય નઃ ॥

તર્દ હૈ પતઙ્ગ હૈ
જભ્ય હા ઉપક્વસ ।
અનદન્ત ઇદં ધાન્યમ્
અહિંસન્તો અપોદિત ॥

તર્દપતે વઘાપતે
તૃષ્ટદંશ્મા શૃણોત નઃ ।
હોત્રેવાપ્રાશિતં હવિર્
વૃક્ણજિહ્વા ઉપાધ્વમ્ ॥

તર્દ જભ્યાપિજિહ્વયા
ય ઇમં દિવ્યં પીયૂષં
પ્રથમસ્ તિતૃપ્સાત્ ।
તં પ્રત્યઞ્ચમ્ અર્ચિષા વિધ્ય મર્મન્ ॥

યે અભ્રજા યે વાતજા
યે દિવસ્ પરિ જજ્ઞિરે ।
મરીચ્યાઃ પુત્રાણાં વયમ્
અપિ નહ્યામ આસ્યમ્ ॥

યે અર્જુના યે હરિતા
યે કૃષ્ણા યે ચ રોહિતાઃ ।
કબન્ધસ્ય પ્રશાસને
શલભ્યાઞ્ જમ્ભયામસિ ॥

અન્તરિક્ષેણ પતત
મા સસ્યમ્ અભિ પદ્ધ્વમ્ ।
ગિરીણાં સાનુષુ સીદત
તૃણં કપાલમ્ અત્તન
શલભાસ્ તદ્ વિશામ્ ઇવ ॥

યથાશ્વાસો યથા ધુરં
યુક્તા વહન્તિ સાધુયા ।
એવા મૂત્ર પ્ર ભિદ્યસ્વ
વિ વસ્તેર્ આસ્યં સૃજ ॥

વિષિતં તે વસ્તિબિલં
સમુદ્રસ્યોદધેર્ ઇવ ।
પ્ર તે ભિનદ્મિ મેહનં
વર્ત્રં વેશન્ત્યા ઇવ ॥

યાઃ સમુદ્રાદ્ ઉચ્ચરન્તિ
જરતીર્ ઉપજિહ્વિકાઃ ।
પ્રમેહણસ્ય તા વિદુર્
ઉભયોર્ મેહનસ્ય ચ ॥

શીર્ષ્ણો વલીર્ આસ્નો વલીર્
અઙ્ગાદઙ્ગાન્ મુખાદ્ વલીઃ ।
સર્વાસ્ તા ઇન્દ્રાણી વલીર્
અપ માર્ષ્ટ્વ્ અધિ ત્વચઃ ॥

યાસ્ ત્વચિ વલયો જાતા
યા જાતાસ્ તન્વસ્ પરિ ।
સર્વાસ્ તા ઇન્દ્રાણી વલીઃ
શમીશાખાસ્વ્ આ સજાત્ ॥

આ શમીં મામકી વલી
રુરોહાતિ જહાતિ મામ્ ।
એતામ્ ઇન્દ્રસ્ય જાયા
વલિધાનીમ્ અકૃણ્વત ॥