Paippalāda-Saṃhitā · Chapter 19.17

yantāsi yacchase hastam
apa rakṣāṃsi sedhasi |
prajāṃ dhanaṃ ca gṛhṇānaḥ
parihasto abhūd ayam ||

parihasta vi dhāraya
yoniṃ garbhāya kartave |
maryāde putram ā dhehi
taṃ tvam ā gamayāgama ||

yaṃ parihastam abibhar
aditiḥ putrakāmyā |
tvaṣṭā tam asyā ā badhnād
yathā putraṃ suvād iti ||

āgacchata āgatasya
nāma gṛhṇāmy āyataḥ |
indrasya vṛtraghno rājño
vāsavasya śatakratoḥ ||

yena sūryāṃ sāvitrīm
aśvinohatuḥ pathā |
tena sam abravīd bhago
jāyām ā vahatād iti ||

yas te aṅkuśo vasudāno
bṛhann indra hiraṇyayaḥ |
tenā janīyate jāyāṃ
tvaṃ dhehi śatakrato ||

tvaṃ no medhe prathamā
gobhir aśvebhir ā gahi |
tvaṃ sūryasya raśmiṣu
tvaṃ no asi yajñiyā ||

medhām ahaṃ prathamāṃ
brahmaṇvatīm ṛṣiṣṭutām |
prapītāṃ brahmacāribhir |
devānām avasā vṛṇe ||

medhāṃ sāyaṃ medhāṃ prātar
medhāṃ madhyandinaṃ pari |
medhāṃ sūryeṇodyatā -
-udīrāṇā u tuṣṭuma ||

pārthivasya rase devā
bhagasya tanvo bale |
āyur asmai somo
varca ā dhād bṛhaspatiḥ ||

āyur asmai dhehi jātavedaḥ
prajāṃ tvaṣṭar adhinidhehy ojaḥ |
rāyaspoṣaṃ savitar ā suvāsmai
śataṃ jīvāti śaradas tavāyam ||

āśīr ṇa ūrjam uta suprajāstvaṃ
dakṣaṃ dadhātu draviṇaṃ suvarcasam |
saṃjayan kṣetrāṇi sahasāham indra
kṛṇvāno anyān adharān sapatnān ||

āyam agan savitā kṣureṇa-
-uṣṇena vāya udakenehi |
ādityā rudrā vasavaḥ sacetasaḥ
somasya rājño 'vapan pracetasaḥ ||

yenāvapat savitā kṣureṇa
somasya rājño varuṇasya vidvān |
tena brahmāṇo vapatedam asya-
- asrāmo dīrghāyur ayam astu vīraḥ ||

aditiḥ śmaśru vapatv
āpa undantu varcasā |
dhārayatu prajāpatiḥ
punaḥpunaḥ suvaptave ||