Paippalāda-Saṃhitā · Chapter 19.16

asthād dyaur asthāt pṛthivy
asthād viśvam idaṃ jagat |
tiṣṭhanti parvatā ime
sthāmann aśvā araṃsata ||

ya udānaḍ vyāyane
ya udānaṭ parāyaṇe |
āvartanaṃ nivartanaṃ
yo gopā api taṃ huve ||

āvṛto nyāvṛto
'bhyavartanam āyanam |
agneś catasra āvṛtas
tābhiṣ ṭvā tarpayāmasi ||

jātavedo ni vartaya
śataṃ te santv āvṛtaḥ
sahasraṃ ta upāvṛtaḥ |
tābhir enaṃ ni vartaya ||

adārasṛd bhavatu deva soma-
-asmin yajñe maruto mṛḍatā naḥ |
mā no vidad abhibhā mo aśastir
mā naḥ prāpad ducchunā dveṣyā yā ||

yo adya daivyo vadho
jighāṃsan na upāyati |
yuvaṃ taṃ mitrāvaruṇav
asmad yāvayataṃ pari ||

itaś cāmutaś cāghaṃ
varuṇa yāvaya |
vi mahac charma yaccha
varīyo yāvayā vadham ||

apendra prāco maghavann amitrān
apāpāco abhibhūte nudasva |
apodīco apa śūrādharāca
urau yathā tava śarman madema ||

tena bhūtasya haviṣā
punar ā pyāyatām ayam |
jāyāṃ yām asmā avidaṃ
sā rasenābhi vardhatām ||

abhi vardhatāṃ prajayā -
-abhi rāṣṭreṇa vardhatām |
īṣā sahasravīryāv
imau stām anupakṣitau ||

tvaṣṭā jāyām ajanayat
tvaṣṭāsyai tvāṃ patiṃ dadhau |
tvaṣṭā sahasram āyūṃṣi
dīrgham āyuḥ kṛṇotu vām ||

antarikṣeṇa patati
viśvā bhūtāvacākaśat |
śuno divyasyaitan mahas
tasmā etena haviṣā juhomi ||

apsu te janma divi te sadhasthaṃ
samudra ātmā mahimā te pṛthivyām |
śuno divyasyaitan mahas
tasmā etena haviṣā juhomi ||

ye trayaḥ kālakāñjā
divi devā iva śritāḥ |
tān sarvān ahva ūtaye
'smā ariṣṭatātaye ||

yaḥ puruṣaṃ hūrcchayasi
śvā divyo avīrahā |
taṃ tvāhaṃ brahmaṇā nude
puruṣaṃ mā parā vadhīḥ ||

yaḥ piśaṅgo ayodaṃṣṭraḥ
śvā divyaḥ pariplavaḥ |
tasyāhaṃ nāma jagrabha-
-asmā ariṣṭatātaye
ayaṃ no jīvatād iti ||

ayaṃ no nabhasas patiḥ
saṃsphāno abhi rakṣatu |
asamātiṃ gṛheṣu naḥ ||

tvaṃ no nabhasas patir
ūrjaṃ gṛheṣu dhāraya |
ā puṣṭam etv ā vasu ||

deva saṃsphāna sahasrāpoṣasyeśiṣe |
tasya no dhehi tasya te bhakṣīmahi
tasya te bhaktivāṃso bhūyāsma svāhā ||