પૈપ્પલાદ-સંહિતા · અધ્યાય 19.17

યન્તાસિ યચ્છસે હસ્તમ્
અપ રક્ષાંસિ સેધસિ ।
પ્રજાં ધનં ચ ગૃહ્ણાનઃ
પરિહસ્તો અભૂદ્ અયમ્ ॥

પરિહસ્ત વિ ધારય
યોનિં ગર્ભાય કર્તવે ।
મર્યાદે પુત્રમ્ આ ધેહિ
તં ત્વમ્ આ ગમયાગમ ॥

યં પરિહસ્તમ્ અબિભર્
અદિતિઃ પુત્રકામ્યા ।
ત્વષ્ટા તમ્ અસ્યા આ બધ્નાદ્
યથા પુત્રં સુવાદ્ ઇતિ ॥

આગચ્છત આગતસ્ય
નામ ગૃહ્ણામ્ય્ આયતઃ ।
ઇન્દ્રસ્ય વૃત્રઘ્નો રાજ્ઞો
વાસવસ્ય શતક્રતોઃ ॥

યેન સૂર્યાં સાવિત્રીમ્
અશ્વિનોહતુઃ પથા ।
તેન સમ્ અબ્રવીદ્ ભગો
જાયામ્ આ વહતાદ્ ઇતિ ॥

યસ્ તે અઙ્કુશો વસુદાનો
બૃહન્ન્ ઇન્દ્ર હિરણ્યયઃ ।
તેના જનીયતે જાયાં
ત્વં ધેહિ શતક્રતો ॥

ત્વં નો મેધે પ્રથમા
ગોભિર્ અશ્વેભિર્ આ ગહિ ।
ત્વં સૂર્યસ્ય રશ્મિષુ
ત્વં નો અસિ યજ્ઞિયા ॥

મેધામ્ અહં પ્રથમાં
બ્રહ્મણ્વતીમ્ ઋષિષ્ટુતામ્ ।
પ્રપીતાં બ્રહ્મચારિભિર્ ।
દેવાનામ્ અવસા વૃણે ॥

મેધાં સાયં મેધાં પ્રાતર્
મેધાં મધ્યન્દિનં પરિ ।
મેધાં સૂર્યેણોદ્યતા -
-ઉદીરાણા ઉ તુષ્ટુમ ॥

પાર્થિવસ્ય રસે દેવા
ભગસ્ય તન્વો બલે ।
આયુર્ અસ્મૈ સોમો
વર્ચ આ ધાદ્ બૃહસ્પતિઃ ॥

આયુર્ અસ્મૈ ધેહિ જાતવેદઃ
પ્રજાં ત્વષ્ટર્ અધિનિધેહ્ય્ ઓજઃ ।
રાયસ્પોષં સવિતર્ આ સુવાસ્મૈ
શતં જીવાતિ શરદસ્ તવાયમ્ ॥

આશીર્ ણ ઊર્જમ્ ઉત સુપ્રજાસ્ત્વં
દક્ષં દધાતુ દ્રવિણં સુવર્ચસમ્ ।
સંજયન્ ક્ષેત્રાણિ સહસાહમ્ ઇન્દ્ર
કૃણ્વાનો અન્યાન્ અધરાન્ સપત્નાન્ ॥

આયમ્ અગન્ સવિતા ક્ષુરેણ-
-ઉષ્ણેન વાય ઉદકેનેહિ ।
આદિત્યા રુદ્રા વસવઃ સચેતસઃ
સોમસ્ય રાજ્ઞો ઽવપન્ પ્રચેતસઃ ॥

યેનાવપત્ સવિતા ક્ષુરેણ
સોમસ્ય રાજ્ઞો વરુણસ્ય વિદ્વાન્ ।
તેન બ્રહ્માણો વપતેદમ્ અસ્ય-
- અસ્રામો દીર્ઘાયુર્ અયમ્ અસ્તુ વીરઃ ॥

અદિતિઃ શ્મશ્રુ વપત્વ્
આપ ઉન્દન્તુ વર્ચસા ।
ધારયતુ પ્રજાપતિઃ
પુનઃપુનઃ સુવપ્તવે ॥