પૈપ્પલાદ-સંહિતા · અધ્યાય 19.16

અસ્થાદ્ દ્યૌર્ અસ્થાત્ પૃથિવ્ય્
અસ્થાદ્ વિશ્વમ્ ઇદં જગત્ ।
તિષ્ઠન્તિ પર્વતા ઇમે
સ્થામન્ન્ અશ્વા અરંસત ॥

ય ઉદાનડ્ વ્યાયને
ય ઉદાનટ્ પરાયણે ।
આવર્તનં નિવર્તનં
યો ગોપા અપિ તં હુવે ॥

આવૃતો ન્યાવૃતો
ઽભ્યવર્તનમ્ આયનમ્ ।
અગ્નેશ્ ચતસ્ર આવૃતસ્
તાભિષ્ ટ્વા તર્પયામસિ ॥

જાતવેદો નિ વર્તય
શતં તે સન્ત્વ્ આવૃતઃ
સહસ્રં ત ઉપાવૃતઃ ।
તાભિર્ એનં નિ વર્તય ॥

અદારસૃદ્ ભવતુ દેવ સોમ-
-અસ્મિન્ યજ્ઞે મરુતો મૃડતા નઃ ।
મા નો વિદદ્ અભિભા મો અશસ્તિર્
મા નઃ પ્રાપદ્ દુચ્છુના દ્વેષ્યા યા ॥

યો અદ્ય દૈવ્યો વધો
જિઘાંસન્ ન ઉપાયતિ ।
યુવં તં મિત્રાવરુણવ્
અસ્મદ્ યાવયતં પરિ ॥

ઇતશ્ ચામુતશ્ ચાઘં
વરુણ યાવય ।
વિ મહચ્ છર્મ યચ્છ
વરીયો યાવયા વધમ્ ॥

અપેન્દ્ર પ્રાચો મઘવન્ન્ અમિત્રાન્
અપાપાચો અભિભૂતે નુદસ્વ ।
અપોદીચો અપ શૂરાધરાચ
ઉરૌ યથા તવ શર્મન્ મદેમ ॥

તેન ભૂતસ્ય હવિષા
પુનર્ આ પ્યાયતામ્ અયમ્ ।
જાયાં યામ્ અસ્મા અવિદં
સા રસેનાભિ વર્ધતામ્ ॥

અભિ વર્ધતાં પ્રજયા -
-અભિ રાષ્ટ્રેણ વર્ધતામ્ ।
ઈષા સહસ્રવીર્યાવ્
ઇમૌ સ્તામ્ અનુપક્ષિતૌ ॥

ત્વષ્ટા જાયામ્ અજનયત્
ત્વષ્ટાસ્યૈ ત્વાં પતિં દધૌ ।
ત્વષ્ટા સહસ્રમ્ આયૂંષિ
દીર્ઘમ્ આયુઃ કૃણોતુ વામ્ ॥

અન્તરિક્ષેણ પતતિ
વિશ્વા ભૂતાવચાકશત્ ।
શુનો દિવ્યસ્યૈતન્ મહસ્
તસ્મા એતેન હવિષા જુહોમિ ॥

અપ્સુ તે જન્મ દિવિ તે સધસ્થં
સમુદ્ર આત્મા મહિમા તે પૃથિવ્યામ્ ।
શુનો દિવ્યસ્યૈતન્ મહસ્
તસ્મા એતેન હવિષા જુહોમિ ॥

યે ત્રયઃ કાલકાઞ્જા
દિવિ દેવા ઇવ શ્રિતાઃ ।
તાન્ સર્વાન્ અહ્વ ઊતયે
ઽસ્મા અરિષ્ટતાતયે ॥

યઃ પુરુષં હૂર્ચ્છયસિ
શ્વા દિવ્યો અવીરહા ।
તં ત્વાહં બ્રહ્મણા નુદે
પુરુષં મા પરા વધીઃ ॥

યઃ પિશઙ્ગો અયોદંષ્ટ્રઃ
શ્વા દિવ્યઃ પરિપ્લવઃ ।
તસ્યાહં નામ જગ્રભ-
-અસ્મા અરિષ્ટતાતયે
અયં નો જીવતાદ્ ઇતિ ॥

અયં નો નભસસ્ પતિઃ
સંસ્ફાનો અભિ રક્ષતુ ।
અસમાતિં ગૃહેષુ નઃ ॥

ત્વં નો નભસસ્ પતિર્
ઊર્જં ગૃહેષુ ધારય ।
આ પુષ્ટમ્ એત્વ્ આ વસુ ॥

દેવ સંસ્ફાન સહસ્રાપોષસ્યેશિષે ।
તસ્ય નો ધેહિ તસ્ય તે ભક્ષીમહિ
તસ્ય તે ભક્તિવાંસો ભૂયાસ્મ સ્વાહા ॥